OEKUSI, 11 Juñu (TATOLI) – Abitante hamutuk 145 ne’ebé okupa rai Estadu atu hala’o negósiu iha merkadu Numbei, perténsia ba suku Costa, sub-rejiaun Pante Makasar, Rejiaun Administrativa Espesiál Oekusi Ambeno (RAEOA), koopera ho Governu hodi sobu rasik sira-nia uma tanba antes ne’e hetan ona notifikasaun no xamada husi Sekretáriu Estadu Asuntu Toponímia no Organizasaun Urbana (SEATOU) atu hamamuk merkadu referidu durante fulan-ida, hahú husi loron 24 Marsu to’o 24 Abríl 2025.
“Ami apresia ho planu Governu atu halo dezenvolvimentu, ami apoia atu hadi’a fatin ne’e sai di’ak, tanb ita observa nia kondisaun ladun di’ak, balun faan no la faan mós hela hotu iha ne’e, entaun imajén ladun di’ak, tan ne’e mak ami hothotu konkorda hodi koopera, di’akliu ami sobu rasik duke Governu mai sobu no estraga tiha kalén, ai no bajaringan, agora ita rasik haree, ema barak sai ona ba buka fatin atu hela,” Jestór merkadu Numbei, Fernando de Souza Neca, dehan iha Oekusi, ohin.
Notísia relevante:24 Abríl, SEATOU husu negosiante iha merkadu Numbei-Oekusi hamamuk fatin
Nu’udar Vendedór ne’ebé hela dezde 2005, nia rekomenda ba Governu liuliu Autoridade RAEOA no SEATOU, atu konsidera patrimóniu sira-ne’ebé komunidade sira konstrui ona hanesan uma, ai-oan no seluk tan atu fó indemnizasaun.
“Ami lakohi husu uluk, Governu tenki haree ami-nia sasán sira-ne’ebé ami halo ona, tanba ami hela iha ne’e, balu iha 2003 balu iha 2006, ne’ebé uma, ai-oan barak ami kuda ona, ami husu bele fó fali ganti-rugi,” nia rekomenda.
Iha fatin hanesan, António Lelan, reforsa-tan, katak, Governu presiza fó indemnizasaun liuliu ba uma no plantasaun sira.
“Ami simu ona notifikasaun no avizu husi SEATOU, ne’e mak ami sobu daudaun ona, la presiza hein, tanba Estadu ne’e ba ita, entaun ita tenki koopera atu hadi’a merkadu ne’e sai modernu, ami espera Governu bele hadi’a depois forma, sira-ne’ebé faan mak bele faan iha fatin ne’e, no ami husu presiza indemnizasaun ba ami-nia uma sira, kona-ba rai laiha problema tanba ne’e rai Estadu, maibé konsidera de’it ai-oan sira, hanesan haas, nu no seluk tan, presiza selu,” nia hateten.
Notísia relevante:PA RAEOA: presiza kria kondisaun molok hasai negosiante iha merkadu Numbei
Hatan ba rekomendasaun sira-ne’e, Sekretáriu Rejionál ba Asuntu Administrasaun, Andre La’o, informa katak, antes ne’e ekipa konjunta komposta husi Diresaun Rejionál Agrikultura, Terra Propriedade, Komersíu no Indústria inklui Diresaun Rejionál Infraestrutura rekolla ona dadús, hodi submete ba Prezidente Autoridade RAEOA hodi deside kona-ba indemnizasaun nian.
“Agora ita hein de’it, desizaun husi Prezidente Autoridade, tanba dadus sira hotu, ekipa foti ona iha térrenu, ne’ebé husu ba ita-nia negosiánte sira atu pasiénsia hein desizaun Governu nian, bainhira mak fó indemnizasaun,” nia dehan.
Notísia relevante:SEATOU kontinua sosializa dekretu-lei ijiene no orden públika iha Oekusi
Jornalista: Abílio Elo Nini
Editór: Florencio Miranda Ximenes
