SMAS Kovalima foin implementa atividade rua

KOVALIMA, 12 Juñu 2025 (TATOLI) – Servisu Munisipál Asaun Sosiál (SMAS), hahú iha trimestre ba dahuluk no ba daruak foin mak implementa atividade rua hanesan atividade funeráriu públiku apoia kaixaun ba família vulneravel no materiál eskritóriu hanesan atu halo limpeza, tanba hein orsamentu sei prosesu iha finansa munisípiu.

“Ami mak implementa atividade rua mak hanesan atu funeráriu públiku hodi apoiu kaixaun ba família matebian ne’ebé submete karta no mós atividade limpeza jerál seluk seidauk implementa tanba sei hein prosesu orsamentu”, Diretór Servisu Munisipál Asaun Sosiál, Clementino Bere informa ba TATOLI, iha Bairru Kosta, ohin.

“Atu hala’o atividade sira seluk ami sei hein orsamentu tanba prosesu orsamentu lori tempu uitoan entaun sei hein hela no haree mós daudaun iklima udan hela,” dirijente ne’e énfaze.

Atividade ne’ebé seidauk konsege implementa ne’e mak hanesan hala’o kampaña Violénsia Doméstika (VD) no sosio-ekonómiku sei hein orsamentu, maibé daudaun ne’e finansa munisípiu esforsu hela hodi prosesa verba ne’e.

Atividade apoiu kaixaun ba trimestre ba daruak seidauk hatene tanba Juñu foin tama iha loron 10 maibé ba trimestre dahuluk apoiu ona kaixaun hamutuk unidade 51 ne’ebé mak fó apoiu ho medida la hanesan mak hanesan, medida ki’ik senti metru 60-80 hamutuk 13, ho nia  folin kada kaisaun $ 60,  ba fulan tolu gasta osan $ 780.00, medida naton senti metru 95-130 tolu ne’ebé kada kaixaun folin $ 95.00 ba kaixaun tolu gasta ona osan $ 285.00 no medida boot senti metru 140-200 ho nia folin kada kaixaun $170 ne’ebé kaixaun 18 gasta ona osan hamutuk $ 5,950.00.

Orsamentu Jerál Estadu  (OJE) aloka ba Servisu Munisipál Asaun Sosiál uza hodi apoiu kaixaun ba 2025 ne’e hamutuk $ 59.000.00. Husi orsamentu ne’e, trimesre ba dahuluk SMAS gasta ona osan hamutuk $ 7,015.00 balansu $ 42,985.00

Governu sentrál aloka Orsamentu Jerál Estadu (OJE)  2025 mai Kovalima hamutuk,  $ 8,293.634. Husi orsamentu ne’e, aloka ba SMAS hamutuk $ 153.497.00.

Jornalista:Celestina Teles

Editór: Rafael Ximenes de A. Belo