DILI, 19 Juñu 2025 (TATOLI) – Organizasaun naun governamentál Plan International Timor-Leste (PITL, sigla inglés) servisu hamutuk ho Asosiasaun Halibur Defisiénsia Matan Timor-Leste (AHMDTL) no Arkuiris Timor-Leste sei implementa projetu inkluzaun sosiál ba suku 12 ne’ebé kompostu husi munisípiu tolu; Ainaru, Ermera no Dili.
Funsionáriu programa inkluzaun no ema ho diversidade PITL, Egas de Sousa, esplika, Uniaun Europeia (UE) mak apoia ba organizasaun tolu, hanesan; PITL, AHMDTL no ATL. Implementasaun projetu hala’o direta husi Plan Internasionál no indika munisípiu tolu sai tarjetu ba projetu inluzaun no diversidade.
“Dalabarak termu ema ho defisiénsia no mós ema diversidade ne’e sempre mosu diskriminasaun iha sosiedade no mós família nia leet, nune’e sira sente marjinalizadu loos ba sira-nia moris,” membru PITL ne’e informa ba jornalista iha salaun ALFELA, Villa-Verde, kinta.
Nia esplika, ho inisiativa ida atu halo sosializasaun liga ba asuntu ema ho diversidade no ema ho defisiensia, nune’e komunidade sira iha suku bele hatene konseitu husi termu rua ne’e.
“Maske projetu ne’e hala’o durante tinan rua no mudansa ne’ebé mak iha hanesan komunidade sira komesa simu ona ema marjinalizadu sira no trata sira hanesan ho ema seluk,” nia relata.
Projetu ne’e foka liu ba intervensaun rua: Dahuluk, promove igualdade, inkluzaun no respeitu ba diversidade ba ema hotu-hotu, liuliu EhD no LGBTQI+, kombate estigmatizasaun, diskriminasaun no violénsia hasoru grupu sira-ne’e.
Daruak, apoia direitu umanu hotu-hotu ne’ebé esensiál ba dignidade umana, inklui responde ba nesesidade báziku sira, hanesan edukasaun no formasaun profisionál no promove kondisaun servisu-ne’ebé di’ak ba EhD no LGBTQI+ no hametin protesaun legál ba grupu alvu sira liuhusi advokasia hodi hametin lejizlasaun nia sensibilidade ba EhD no LGBTQI.
Entretantu suku 12 ne’ebé sai tarjetu ba PITL nia projetu,implementa iha munisípiu tolu kompostu husi suku 12 hanesan, Komoro, Vila-Verde, Kamea, Dare, Ainaru Villa, Manutasi, Manufahi, Maubisse, Poetete, Hatukeru, Estadu no Riheu.
Notísia relevante: PITL realiza formasaun inkluzaun sosiál ba jornalista sira
Jornalista: Alexandra da Costa
Editora: Evaristo Soares Martins
