BOBONARU, 25 Juñu 2025 (TATOLI)—Diretór Servisu Munisipál Saúde (SMS) Autoridade Munisípiu Bobonaru, Gíl Bernardo Vicente, fó hanoin ba komunidade sira katak bainhira hetan asidente asu tata ema ruma tenke fase lalais durante minutu 15 hafoin lori ba fasilidade saúde simu Vasina atu prevene-aan husi Virus Raiva.
Notísia Relevante:Saúde Bobonaru rejista kazu asu tata ema 137 no óbitu rua
Nia hatutan, daudaun dadaun ne’e iha Bobonaru tanba iha situasaun emerjénsia ba kazu Raiva, tanba ne’e ekipa saúde sira kontinua halo promosaun no edukasaun saúde ba komunidade liuliu sira-ne’ebé iha área risku hanesan Kailaku no Maliana atu labele halo kontaktu ho Asu, Busa no Lekirauk hodi prevene transmisaun virus Raiva.
“Ha’u-nia mensajen ba sira-ne’ebé mak hetan asidente karik asu tata, ami husu nafatin primeiru Fase Kanek ne’e durante minutu 15 halo moos depois tenke lori kedas ba iha fasilidade saúde para bele hetan atendementu no mós halo prevensaun liuhusi dalan Vasina,” Nia informa ba jornalista sira, iha suku Tapo-Memo, kuarta ne’e.
Enkuantu hahú husi Janeiru to’ semana kotuk fulan-Juñu ne’e, Servisu Saúde Bobonaru rejista kazu asu tata ema hamutuk 137.
Husi númeru pasiente hirak ne’e, maioria simu hotu ona Vasina no na’in-rua seluk la simu Vasina ne’e konfirmadu mate tanba infetadu virus Raiva.
Notísia Relevante: Maliana sai fatin risku ba transmisaun virus Raiva
Jornalista : Sergio da Cruz
Editór : Cancio Ximenes
