VIKEKE, 26 Juñu 2025 (TATOLI)—Ministériu Planeamentu Investimentu Estratéjiku (MPIE) liuhusi Sekretáriu Estadu Dezenvolvimentu Lokál (SEDL), Mateus W. do Santos Tallo, entrega ofisiál livru Planeamentu Munisipál Ordenamentu Territoriál (PMOT) munisípiu Vikeke nian Prezidente Autoridade munisípiu VIkeke.
Hafoin ramata emkontru dokumentu PMOT ne’e, Mateus W. do Santos Tallo, esplika PMOT hetan aprova iha fulan-Outubru 2021 no livru PMOT ne’e fó dalan ba estratéjia dezenvolvimentu territoriál no polítika munisipál ordenamentu territóriu nian.
“Nune’e livre PMOT ne’e sai instrumentu ferrmenta nesesáriu, atuorienta no kontrola, okupasaun, uzu transformasaun rai nian husi entidade públiku iha nivél munisipál hodi fó orientasaun ba sosiadade públiku. Ha’u sente, ida-ne’e sai importánsia ba ita PMOT ne’e rasik la’ós ba jestaun edifísiu públiku, estrada no infraestutura sira seluk. Maibé, PMOT ne’e sai hanesan planu estratéjia no sai instrumentu ba jestaun rekursu sira-ne’ebé refleta ba valór sira husi ita-nia povu sira iha munisípiu,” Mateus W. do Santos Tallo, hateten iha serimónia entrega livru PMOT, iha salaun Ti’i Lou, Vikeke Vila, ohin.
Governante ne’e profunda, munisípiu sira sei kontinua dezenvolve tanba ide-ne’e fornese dezenvovlimentu di’ak liután ba nesesidade hela fatin, mudansa ekonómia inklui setór sira seluk ne’ebé propoin iha ona Planu dezenvolvimentu munisipál ba tinan oin mai.
“Tan ne’e, PMOT ne’e sei fó apoia mós Planu dezenvolvimentu munisípiu Vikeke nian, nune’e PMOT sei ajuda ita hodi ordena di’ak ba ita-nia munisípiu. Tanba ne’e, ha’u husu autoridade munisípiu Vikeke no entidade sira konsidera PMOT sai hanesan referénsia ba autoridade sira,” nai dehan.
Iha fatin hanesan, PAM Vikeke, Francisco C.S de Gonzaga Soares, hato’o agradesementu ba MPIE tanba bele elebora no prodús livru PMOT Vikeke nian ne’ebé bele sai hanesan matadalan munisípiu nian ba planu ordenamentu iha futuru.
“Planu Munisipál Ordenamentu Territoriál (PMOT) nu’udár instrumentu fundamentál ne’ebé atu orienta no promove dezenvolvimentu munisípiu Viqueque liuhusi planu integradu, justu no sustentável ho objetivu hodi hadi’a no ordena kualidade moris munisípiu nian. Ami iha ona planu ordenamentu liuliu alargamentu nova sidade administrativu, edifísiu administrasaun sei muda ba fatin foun ne’ebé identifikadu ona. Enkuantu suku Karaubalu sei dezenvolve sai hanesan sidade turizmu, kulturál, indústriál no seluk tan ne’ebé nesesária,” nia dehan.
Iha serimónia entrega livru PMOT ne’e, entrega direta husi SEDL ba PAM Vikeke no hetan partisipa husi Sekretáriu Munisipál Asuntu Sosiál, Komandante Polísia Nasionál Timor-Leste (PNTL) munisípiu Vikeke, Prezidente Konsellu Kombatente Libertasaun Nasionál (CCLN, sigla portugés), Prezidente Kámara Komérsiu Indústria Timor-Leste (CCI-TL, sigla portugés), Administradór Postu Administrativu lima (5), Diretór Servisu Munisipál no Delegasaun Territoriál no autoridade lokál.
Jornalista : Vitorino Lopes da Costa
Editór : Cancio Ximenes
