DILI, 03 Jullu 2025 (TATOLI)—Prezidente Repúblika, José Ramos Horta, hateten kazu moras Raiva ne’ebé aumenta iha Timor- Leste, nu’udar pandemia ida-ne’ebé tenke kontrola no prevene husi Ministériu Saúde ho sériu.
Notísia Relevante: Pasiente raiva husi Kovalima hakotu ona iis iha HNGV
“Problema ne’e hahú kle’ur ona iha Indonézia. Fulan hira liubá, ha’u rasik haruka mensajen alerta ida ba ita-nia setór saúde no sira dehan sei buka tuir problema ne’e, sei la akontese iha Timor- Leste. Ha’u labele fó informasaun ruma, tanba ha’u laiha informasaun kona-ba saida mak Governu halo atu prevene, tanba ida-ne’e pandemia. Tanba, hanesan ita hatene ona, asu sira iha Timor-Leste la’o haleu iha li’ur, no asu barak liu ba rai-li’ur la halo vizita asu sira,” Ramos Horta hateten ba jornalista sira iha Palásiu Prezidensiál Nicolau Lobato, Bairru Pite, ohin.
Horta hateten, asu moras ne’ebé aumenta ba beibeik ne’e perigozu tebes ba povu Timor-Leste, tanba ne’e presiza kontrolu husi Ministériu Saúde.
“Asu moras Raiva ne’ebé aumenta ba beibeik ne’e perigozu tebes. Tuir loloos kazu ne’e fasil atu kontrola, se ema hotu-hotu ne’ebé haki’ak asu tenke rai iha uma maibé vontade laiha. Maibé, ha’u la hatene saida mak Ministériu Saúde halo atu kontrola ida-ne’e, tanba ida-ne’e bele sai aat liután,” Horta dehan.
Tuir Xefe Estadu, moras Raiva seidauk iha ai-moruk atu kura, tanba ne’e presiza halo sensibilizasaun públiku no prevensaun husi parte relasionadu sira.
Prezidente fó hanoin katak, antes ne’e tinan 15 liubá iha TL, kazu fahi ne’e mós fó ameasa ba komunidade nia vida, nune’e Ministériu Saúde foti desizaun hodi oho asu ne’ebé la’o iha dalan sira-ne’e.
Notísia Relevante: Ministériu tolu forma ekipa konjunta ba prevensaun moras raiva
Rekorda fali katak, kazu Raiva iha Timor-Leste, da’et ona ba ema na’in-hitu (7) mak mate no vítima sira-ne’e husi munisípiu Bobonaru, Ermera no Rejiaun Administrativa Espesiál Oé-Cusse Ambaeno (RAEOA).
Iha parte seluk, Ramos Horta relata, moras tuberkuloze sai mós ameasa ba saúde públika no nu’udár kazu ida ne’ebé aas tebes iha Timor-Leste (TL).
“Moras seluk ne’ebé grave liu iha Timor Leste, ezemplu TBC, ema ida iha uma ida-ne’ebé hetan TBC sei kona hotu, tanba sira uza hotu sasán ne’ebé hanesan. Ezemplu, han iha meza, kopu, garfu, bee, roupa, toalla no seluk tan. Ne’e da’et lalais tebes, tanba ne’e TBC ne’e boot tebes iha Timor- Leste. Problema ne’e tanba ema moris besik malu, nia problema ne’e boot tebes,” nia hateten.
Notísia Relevante: Koñese moras rabies hodi salva ita, animál no Timor-Leste
Jornalista : Hortencio Sanchez
Editór : Cancio Ximenes
