DILI, 03 Jullu 2025 (TATOLI)—Ekipa selesaun nasionál modalidade futeból, kinta ne’e, kontinua treinu nu’udár parte husi preparasaun antes kompete iha jogu Komunidade Nasaun Lian Portugés (CPLP-sigla portugeza).
Treinadór Ekipa Nasionál Futeból Timor-Leste, Kim Shin Hwan, esplika jogadór sira hahú treinu iha fulan-Maiu hafoin selesionadu iha kada munisípiu ne’ebé hala’o husi ekipa treinadór sira hanesan treinu mentalidade, serbisu ekipa, téknika no sistema jogu.
“Jogadór sira barak husi munisípiu ne’ebé maioria iha koñesimentu báziku natoon, ida-ne’e presiza hadi’a liuliu mentalidade no treinadór sira nafatin esforsu atu fó matéria ho didi’ak,” Treinadór ekipa selesaun futeból nasionál Timor-Leste informa ba TATOLI iha kampu Bekora.
Kim salienta, tempu ba preparasaun limitada no hela semana-rua tan kompetisaun hahú nune’e jogadór sira kontinua treinu maibé atualmente foku liubá téknika no sistema jogu kona-ba hasoru ekipa adversária sira.
Kim rekoñese jogadór husi nasaun CPLP maioria iha talentu no kategoriza profisionál maibé la’ós sai barreira ba Timor-Leste.
“Ita kontinua esforsu-aan maka’as liután hodi atinje objetivu,” Kim argumenta.
Futebolista ne’ebé halibur iha ekipa selesaun nasionál iha jogu CPLP hamutuk na’in-20 maibé tuir planu sei elimina na’in-rua hodi prenxe kouta jogadór 18 ne’ebé kategoria U-16 kompostu husi idade 14 to’o 16.
Entretantu, jogu CPLP sei realiza iha Timor-Leste no sei partisipa nasaun hitu ho totál atleta hamutuk 535 ne’ebé halo preparasaun faze tolu hanesan interna, prepara realizasaun no ezekusaun ne’ebé sei halo abertura iha loron 17 Jullu no sei enserra iha 27 Jullu, tinan ne’e.
Jornalista: Natalino Belo
Editór: Xisto Freitas da Piedade
