DILI, 05 Jullu 2025 (TATOLI) – Governu Timor-Leste delega Ministru Petróleu no Rekursu Minerais, Francisco Monteiro hodi partisipa iha misaun fahe esperiénsia g7+ iha Honiara, Illa Salomão, ne’ebé sei hala’o iha loron 07 to’o 11 jullu 2025.
Ministru Francisco Monteiro, hetan fiar hodi reprezenta Governu iha misaun ida ne’e, ho foku primáriu ba kooperasaun iha ámbitu jestaun rekursu naturais, partikularmente petróleu no gás.
Misaun ne’e halo parte iha programa koperasaun frájil-ba-frájil g7+, ne’ebé ho objetivu atu hametin solidariedade entre nasaun membru sira liuhosi troka esperiénsia no aprendizajen entre nasaun sira.
Ministru Francisco Monteiro sei hasoru malu diretamente ho Ministru Minarai, Enerjia no Eletrifikasaun Rural Illa Salomaun, Bradley Tovosia, hodi ko’alia kona-ba kolaborasaun potensiál iha setór enerjétiku.
Ajenda prinsipál tolu misaun nian inklui :
1. Fahe esperénsia : Fo oportunidade ba nasaun rua atu fahe sira nia atinjimentu, dezafiu no lisaun aprende iha area minarai no gas nian
2. Konsolida nivel ministerial : haforsa no hasae relasaun bilateral entre Ministru Petróleu husi nasaun rua
3. Kolaborasaun iha futuru : oportunidade sei fasilita tebes kolaborasaun sira iha futuru liu-liu halo interkambiu koñesimentu iha area minarai no gas nian entre nasaun rua.
Delegasaun Timor-Leste envolve mós instituisaun téknika no estratéjiku lubuk ida, hanesan Autoridade Nasionál Petróleu (ANP), Autoridade Nasionál Minerais (ANP), Timor GAP, Murak Rai Timor, Institutu Jeosiénsia TL, no EITI (Inisiativa Transparénsia Indústria Estrativa). Ekipa husi Sekretariadu g7+ iha Dili mós akompaña misaun iha Illa Salomão.
Illa Salomão rasik sai hanesan membru ativu ida hosi g7+ dezde nia inísiu. Ninia ekonomia bazeia ba agrikultura, peska, no estrasaun rekursu hanesan osan-mean no nikel.
Nasaun ne’e mós hala’o papél ativu iha atividade g7+, inklui haruka Ministru Negósiu Estranjeiru, Peter Shanel Agovaka, nu’udar Prezidente eleitu g7+ nian ba períodu 2026-2028. Nomeasaun ne’e fó sai iha Reuniaun Ministeriál ba dala 6 hosi g7+ iha fulan-Abril tinan 2025.
Misaun ba Honiara nu’udar demonstrasaun konkreta ida kona-ba kompromisu Timor-Leste nian atu hametin diplomasia dezenvolvimentu liuhosi plataforma g7+, no hatudu ninia prontidaun atu servisu besik ho maluk estadu frajil sira iha rejiaun Pasífiku.
Jornalista : Cidalia Fátima
Editora : Armandina Moniz
