DILI, 08 Jullu 2025 (TATOLI)—Vise-Ministru ba Fortalesimentu Instituisionál Saúde, Jose dos Reis Magno, rekoñese katak vasina anti raiva estoke mamuk iha kada fasilidade saúde sira no Ministériu Saúde planeia atu sosa iha tempu badak.
Notísia Relevante: INFPM husu apoiu vasina raiva ba OMS
“Loos duni katak ita-nia estoke vasina antí Raiva iha fasilidade saúde laiha ona no iha INFPM mak estoke iha maibé menus ona. Ami hato’o ona relatóriu ba Ministra Saúde no fó ona orientasaun atu koordena entidade relavante sira iha Ministériu Saúde atu halo planu hodi sosa,” Jose dos Reis Magno hateten ba jornalista sira, iha Otel Novu Turizmu, ohin.
Nia hateten, Ministériu Saúde halo ona diskusaun ho Organizasaun Mundiál Saúde atu haree mós ba iha posibilidade balun kona-ba atu sosa ai-moruk, tanba Ministériu Saúde iha hela orsamentu atu kompra vasina ida-ne’e.
“Liuhusi ita-nia parseiru sira lalais no fasil liu, hodi bele to’o iha TL no ita garante nia kualidade vasina ne’e rasik. Ha’u mós horisehik informa ona ba Ministra Saúde kona-ba situasaun ida-ne’e, tanba ita hanesan Estadu membru ba Organizasaun Mundiál Saúde. Bainhira iha situasaun ne’e ita deklara ona katak Raiva ne’e situasaun emerejénsia ba ita-nia rain. Tanba, ita hanesan Estadu membru atu bele asesu ka sira fasilita ita hanesan organizasaun globál nian atu tulun ita,” nia dehan.
Nia haktuir, Governu mós iha ona alternativa hodi diskute ho ajénsia sira buka dalan atu haree asuntu ida-ne’e, tanba ne’e husu ba komunidade tenke asegura sira-nia animál liuliu asu, busa no lekirauk labele husik la’o livre hodi fó risku ba ema seluk.
Entertantu, tuir dadus katak ema-ne’ebé mak mate ba kazu Raiva hamutuk ona na’in-hitu (7) husi ne’e RAEOA na’in-tolu (3), Bobonaru na’in-rua (2), Ermera na’in-ida (1) no Covalima na’in-ida (1).
Notísia Relevante: Asu hamutuk 13.223 mak hetan ona vasina kontra raiva
Jornalista : Felicidade Ximenes
Editór : Cancio Ximenes
