DILI, 10 Jullu 2025 (TATOLI)—Federasaun Futeból Timor-Leste (FFTL) fó-sai lista naran jogadór ekipa nasionál ne’ebé sei partisipa iha jogu kompetisaun Association of Southeast Asian Nations (ASEAN) Championship Mandiri Cup tinan 2025 iha Indonézia.
Lista hirak-ne’e TATOLI asesu liuhosi pájina ofisiál FFTL iha 10 Jullu ne’e ne’ebé fó-sai naran jogadór ekipa nasionál hamutuk 24 kategoria U-23.
Ekipa nasionál Timor-Leste partisipa iha ASEAN U-23 Championship Mandiri Cup 2025 sei kolokadu iha grupu C iha-ne’ebé sei hala’o jogu kontra nasaun rua seluk hanesan Thailándia no Myanmar ne’ebé jogu sei realiza iha estádiu prinsipál Gelora Bung Karno no Patriot Candrabhaga hahú loron 15-31 Jullu 2025.
“Kompetisaun futeból iha Rejiaun Sudeste Aziátiku ne’e organiza hosi Federasaun Futeból ASEAN (AFF), espesifikamente ba selesaun nasionál sira iha kategoria idade U-23,” sira husi Pájina ofisiál FFTL.
Tuir mai lista naran jogadór ekipa selesaun nasionál ne’ebé fó-sai husi FFTL hanesan Guarda rede hamutuk na’in-tolu kompostu Márcio de Jesus, Filintino Nugeira no Egidio Oliveira.
Postu defeza hamutuk jogadór na’in-hitu hanesan Sandro Quintão, Lian Farrugia, Aidan Pereira, Anizo Correia, Mario Quintão, Jackson Fowler no Ricardo Bianco.
Postu médiu hamutuk jogadór na’in-ualu kompostu husi Leonio Freitas, Palomito Ribeiro, Fretiliano Santos, Luís Ribeiro, Oatnasio Guterres, Jorge Godinho no Zenivio Mota.
Postu avansadu (forward) sei prenxe jogadór na’in-lima kompostu husi Olagar Xavier, Alexandro Lemos, Nicholas Fowler, Fábio Pires no Kenny Ximenes.
Jornalista: Natalino Belo
Editór: Xisto Freitas da Piedade
