Dezenvolve ekonomia família, AFMEF eleva abilidade grupu feto iha Oekusi

OEKUSI, 16 Jullu 2025 (TATOLI) – Asosiasaun Feto Mudansa Ekonomia Família (AFMEF) fasilita formasaun ba grupu feto hamutuk hitu iha Rejiaun Administrativa Espesiál Oekusi Ambeno (RAEOA) hodi eleva kapasidade no abilidade atu dezenvolve ekonomia família.

Notísia relevante:AFMEF oferese fundu rotativa rihun $83 hasa’e kreatividade grupu feto 35 iha Oé-Cusse

Formasaun ne’e, abertura husi Prezidente Autoridade RAEOA, Rogério Lobato. Formasaun ne’e  nu’udar parte ida husi programa harii empoderamentu lideransa no negósiu ba grupu feto komunitária ne’ebé hetan apoia finánseira mai husi Fundu Apoia Sosiedade Sívil (GASC) ho nia objetivu atu hasa’e kapasidade no abilidade emprezariál grupu feto sira-nian, iha setór ekonomia, hodi enkoraja kreximentu ekonómia lokál no hametin prinsípíu inkluzividade no rezidénsia negósiu ki’ik nian.

“Ne’e inisiátiva importante, tanba fó kapasitasaun bo’ot ba ita-nia inan-feton sira, la’ós atu halo de’it Tais maibé atu dezenvolve mós ekonomia família, liuhusi atividade feto nian. Ha’u kontente, tanba atividade AFMEF ne’e hahú iha 2019 no mantein nafatin sira-nia atividade to’o agora. Tanba ne’e, ba oin autoridade sei fó apoia konkretu atu kontinua habelar sira-nia atividade ne’e, la’ós ba suku hitu de’it maibé ba suku 20 iha Oekusi,” Rogério Lobato, ko’alia iha abertura, hala’o iha restaurante Nidela Padimau, ohin.

Iha biban ne’e, nia apela ba grupu feto sira, atu labele dezanima, tenke la’o ba oin nafatin, tanba Autoridade RAEOA sei tau matan liuhusi apoia subvensaun públika, atu bele kontinua implementa programa sira-ne’ebé fó benfisíu direita ba feto sira.

Notísia relevante:AFMEF husu Governu solusiona tais ne’ebé la konsege aprezenta ba Expo Dubai

Iha fatin hanesan, Diretora Asosiasaun Feto Mudansa Ekonómia Família (AFMEF), Joana Bobo Tanu, esplika, formasaun ne’e fokuliu ba modelu Tais, nune’e bele promove kultura Tais Oekusi nu’udar identidade povu Atoni nian.

“AFMEF prontu atu fahe informasaun ba kualker atividade liuliu ba Tais, ami sei esforsa atu ba oin labele fasilita de’it formasaun ba suku hitu de’it maibé ba suku 20 iha Oekusi atu fahe esperiénsia ne’ebé AFMEF iha atu trasmite ba inan-feto sira, tanba Tais ne’e mak ita-nia identidade nu’udar kultura Oekusi nian. Entaun, ita tenki promove ita-nia Tais ne’e,” Joana Bobo Tanu dehan.

Nia lembra, katak dezde AFMEF eziste iha Oekusi iha 2019 hala’o kna’ar ho voluntarimente, maibé to’o 2021, AFMEF hetan apoia fundu husi Sekretária Estadu Igualdade no Inkluzaun (SEII) konsege harii grupu feto 34, kontinua ba to’o 2023 harii tan grupu feto 35.

“Agora daudaun ami hetan tan apoia fundu husi GASC, mak harii tan grupu hitu ne’ebé ohin sira tuir formasaun ne’e, mak hanean Suku Bobometo, Bobokase, Naimeko, Nipani, Costa, Lifau Lalisuk,” nia hato’o

Notísia relevante:RAEOA-AFMEF selebra kontratu dezenvolve grupu feto 34 

 Jornalista: Abílio Elo Nini

Editór: Rafael Ximenes de A. Belo