MS garante aihan nutritivu ba atleta sira partisipa jogu desportivu CPLP
DILI, 17 Jullu 2025 (TATOLI)—Diretora Nasionál Nutrisaun iha Ministériu Saúde, Rosy da Silva, hateten Ministériu Saúde liuhusi Diresaun Nutrisaun sei garante aihan nutritivu hanesan modo-tahan, naan, ikan, koto, foremungu, manu-tolun ba atleta sira-ne’ebé partisipa jogu desportivu Komunidade Nasaun Lian Portugés (CPLP) 2025 iha Timor-Leste.
Notísia Relevante: Abertura Jogu CPLP: Timor-Leste aprezenta estilu dansa lima
“Ministériu Saúde espesifikamente seksaun nutrisaun, halo mós parte iha estrutura implementasaun ba Jogu CPLP 2025. Komisaun ne’e inklui mós seksaun sira-ne’ebé kaer nutrisaun, monitorizasaun saúde públika no saneamentu. Tanba ne’e, Diresaun Nutrisaun sei tau matan ba preparasaun aihan nutritivu ba atleta sira ne’ebé partisipa iha Jogu desportivu CPLP,” Rosy da Silva hateten ba Agência Tatoli iha nia kna’ar fatin, Lahane, ohin.
Nia esplika, ekipa Diresaun Nutrisaun oras ne’e halo hela fiskalizasaun ba fornesimentu aihan nutrisaun ba atleta Timor-Leste sira, ne’ebé oras ne’e daudaun iha Otél Ramelau hodi garante preparasaun ótimu ba jogu sira.
“Ba atleta Timor-Leste na’in 103 ne’e, ami hahú ona preparasaun. Ami kolabora hela ho péritu nutrisaun sira iha Dili hodi garante nutrisaun ne’ebé di’ak ba atleta sira. Prosedimentu Ministériu Saúde ezije atu atleta sira hetan nutrisaun padraun hahú hosi preparasaun ba kompetisaun CPLP liuhusi kompetisaun loloos ne’e rasik,” nia hateten.
Nia hatutan, Diresaun Nutrisaun halo ona selesaun ba menu hahan nutritivu dezde fulan kotuk ba atleta hotu, hahú husi preparasaun to’o kompetisaun.
“Ezemplu, atleta Timor Leste sira agora daudaun iha Otél Ramelau simu hela hahán nutritivu husi Otél refere. Menu ne’e rekomenda husi Ministériu Saúde. Ida-ne’e garante sira mantein dieta ne’ebé riku ho nutriente no riku ho enerjia hodi habokon fali sira-nia enerjia durante preparasaun,” nia dehan.
Nia hatutan, prepara aihan iha buat rua (2) mak dahuluk halo triajen ba atleta sira hodi avalia sira-nia estatutu nutrisaun no tipu kompetisaun ne’ebé sira partisipa, nune’e bele prepara hahan nutritivu ne’ebé tuir padraun.
“Aleinde fornese aihan ba atleta sira, ami mós asegura oráriu refeisaun regulár, inklui almosu, no jantar, aumenta ho merenda rua, ne’ebé mak rejista ona,” nia hateten.
Diretór ne’e subliña, Diresaun Nutrisaun sei kontinua halo akompañamentu ba atleta sira-nia konsumu nutrisionál tantu iha otél no mós iha kampu durante preparasaun no kompetisaun CPLP nian.
“Departamentu nutrisaun sei fiskaliza mós nutrisaun husi atleta internasionál sira, tanba atleta na’in 485 husi nasaun sira CPLP nian mak sei partisipa iha jogu sira. Ekipa ida tenke destaka iha otél sira-ne’ebé maka atleta sira sei hela,” nia haktuir.
Ministériu Saúde mós kolabora hela ho péritu sira nutrisaun nian husi nasaun CPLP ida-idak, ho nasaun ida-idak lori péritu nutrisaun nian hodi tau matan ba atleta sira-nia hahán.
“Otél neen mak oras ne’e daudaun rejistu iha Diresaun nutrisaun mak hanesan Hotel Golgota, Novu Turismo, Excelsior Resort, Beach Garden, Hotel Timor, no Hotel Ramelau,” nia dehan.
Tuir oráriu, jogu desportivu CPLP ne’e sei hala’o abertura iha iha sábadu (19 Jullu 2025) nei sei ensera iha sábadu (26 Jullu 2025).
Notísia Relevante: Ótel ualu konfirmadu fasilita delegasaun nasaun hitu partisipa jogu CPLP iha TL
Jornalista : Felicidade Ximenes
Editór : Cancio Ximenes
