BOBONARU, 17 Jullu 2025 (TATOLI)—Sekretariadu Programa Nasionál Dezenvolvimentu Suku (PNDS) Autoridade Munisípiu Bobonaru hahú reabilita estrada iha área Moleana, Suku Ritabou, Postu administrativu Maliana ho totál distánsia killmentru tolu.
Abitante Moleana, Delfina de Araújo sente kontente ho reabilitasaun estrada ne’e tanba durante ne’e sira sempre halerik ba estrada.
“Ami agradese tebes tanba iha tempu udan ami atu bá-mai mós ladi’ak, maibé agora di’ak ona hodi fasilita ami,” Delfina informa ba jornalista sira iha terrenu, Kinta ne’e.
Entretantu, Xefe Aldeia Moleana, Aquito Letto konsidera katak implementasaun obra ne’e aleinde fasilita movimentasaun komunidade Moleana, fasilita mós vizitante sira atu vizita sítiu turístiku hanesan Monumentu Masakre Mali-Ubu.
“Ami orgullu tebes ba atividade dezenvolvimentu suku ne’ebé daudaun ne’e implementa ona iha fatin ne’e. Ita-nia komunidade servisu ho entusiazmu tebes, servisu ho neon ho laran tomak tanba dezenvolvimentu ba ita-ni aan rasik,” nia hakotu.
Projetu referidu ezekuta ho orsamentu $36.388,06, ho durasaun tempu fulan lima.
Jornalista: Sergio da Cruz
Editór: Xisto Freitas da Piedade
