OEKUSI, 18 Jullu 2025 (TATOLI) – Dirijente na’in-22 iha serbisu saúde Rejiaun Administrativa Espesiál Oekusi Ambeno (RAEOA) hasa’e abilidade liuhusi formasaun durante loron lima, hodi aprende kona-ba jestaun lideránsa ne’ebé fasilita hosi Institutu Nasionál Saúde Públika Timor-Leste (INSPTL).
Reprezentante INSPTL, António Bonito, nu’udar formadór, esplika, objetivu husi formasaun ne’e, atu hasa’e koñesimentu no abilidade ba jestór no dirijente sira iha servisu saúde rejionál, Ospitál Referál Oekusi inklui sentru saúde no postu saúde sira iha sub-rejiaun Pássabe, Nítibe, Oésilo no Pante Makasar.
Imajen TATOLI/Abílio Elo Nini
“Intensaun husi formasaun ne’e mak atu hasa’e ita-nia lideránsa sira-nia koñesimentu no abilidade tanba saúde atende direita povu nia vida, entaun presiza halo refres ba ita-nia kapasidade, tanba asumi kargu nu’udar dirijente, entaun jestaun lideránsa ne’e importante, nune’e bele jere serbisu iha fatin serbisu, tuir matadalan ne’ebé Ministériu Saúde hatuur ona, entaun durante loron limasira aprende, ho teoria no prátika,” nia ko’alia iha enseramentu ne’ebé hala’o iha salaun administrasaun Numbei, ohin.
Notísia relevante: INSPTL hasa’e koñesimentu ba profisionál saúde 25 iha Oekusi
Nia informa, formasaun durante loron lima, hahú segunda 14 Jullu no termina iha loron sesta-feira ohin, 18 Jullu 2025 ho nia materia prinsipál hamutuk 12 mak hanesan.
Iha loron segunda aprende kona-ba, visaun no misaun valór sira iha Ministériu Saúde, ita sé mak lidér ho jestór, introdusaun melloramentu kualidade. Iha loron tersa-feira aprende kona-ba deskrisaun servisu, introdusaun kona-ba konseitu orientasaun no indusaun, responsabilidade no akontabilidade iha serbisu fatin.
Iha loron kuarta-feira aprende kona-ba, serbisu nu’udar organizasaun ne’ebé nunka para atu aprende, jestaun dezempeñu, hala’o konversasaun sira-ne’ebé defisil jestaun dezempeñu. Kinta-feita kontinua aparende tan introdusaun kona-ba planu kontijénsia no organizasionál, oinsa sai aprezentadór ne’ebé di’ak, iha loron sesta-feira ohin ne’e aprende kona-ba jere hanoin ka stress.
Iha biban ne’e, Sekretáriu Rejionál ba Asuntu Saúde, Luís de Jesus Neno, hateten, hato’o agradese ba INSPTL, tanba antes ne’e Autoridade RAEOA submete pedidu husu apoia atu fasilita formasaun, konsege responde.
Tanba formasaun ne’e ho intensaun atu kapasita kargu direitur no xefe departementu sira, oinsa bele jere serbisu saúde nia lala’ok serbisu iha baze tanba Oekusi iha ospitál referál ida, sentru saúde lima no postu saúde 21.
“Entaun liuhusi treinamentu ne’e, bele tulun sira, atu bele halo planu ba atividade serbisu sira hotu, no bele hatene foti solusaun karik akontese failansu ruma iha serbisu fatin, atu nune’e bele iha kapasidade di’ak jere halo didi’ak, atu atende komunidade sira ho domin no bele hatene jere sasán sira iha hospitál, sentru saúde saúde no postu saúde sira,” nia
Notísia relevante:INSPTL-PHD eleva koñesimentu parteira na’in-45 iha Oekusi
Entretantu, dirijente na’in-22 ne’ebé partisipa iha formasaun durante loron lima mak hanesan, médiku cardiolojista na’in-ida, médiku jerál na’in-tolu, parteira na’in-haat, enfermeiru na’in-ualu, farmasista na’in-ida, analista na’in-ida, saúde públika na’in-tolu no sekondária na’in-ida.
Notísia relevante:Saúde Oekusi klarifika kona-ba inan isin-rua ida hakotu iis iha SS Oésilo
Jornalista: Abílio Elo Nini
Editór: Rafael Ximenes de A. Belo
