OEKUSI, 26 Maiu 2025 (TATOLI) – Sekretáriu Rejionál ba Asuntu Saúde, Luís de Jesus Neno, klarifika kona-ba inan isin rua ho naran Vitória Tebi, ne’ebé hakotu iis, hafoin partu iha Sentru Saúde Oésilo, Rejiaun Administrativa Espesiál Oekusi Ambeno (RAEOA).
“Inan isin ru ne’e mai iha sentru saúde tarde tanba atu partu iha uma, maibé iha problema moras sensitivu ona, mak foin lori ba iha sentru saúde Oésilo, to’o iha ne’e hetan atendimentu di’ak husi parteira sira no partu normál ona, Bebé mós moris ona no Bebé mane, depois inan ne’e han hemu normál hela, maibé hafoin liu tiha minutu balun, moras ipertensaun ne’e (tensaun) ataka derrepente no la biban ona, ikus mai ikus hakotu iis, labarik salva maibé inan labele salva tanba komplikadu ho tensaun ne’e,” Luís de Jesus Neno, ba jornalista sira iha Oekusi, ohin.
Notísia relevante:Janeiru to’o Maiu, Saúde Oekusi rejista inan isin-rua mate iha ospitál
Kona-ba informasaun ne’ebé espalla iha mídia sosiál kona-ba tula iha karreta privada ne’e, nia relata loloos ne’e servisu saúde nia atendimentu ba ema moras , karik pasiente ruma iis kotu ona, ne’e la’os kompetensia pesoál saúde no servisu saúde, maibé ne’e parte sosiál sira resposabiliza hodi translada ho karreta funeráriu.
Maibé hafoin pasiénte ne’e hakotu iis iha sentru saúde Oésilo, parte saúde komunika direita ba servisu sosiál iha Oekusi-vila, atu dezloka karreta funerariu ba tula mate-isin ne’e, maibé família sira deside lakohi hein karreta ne’e, no deside tula de’it iha sira-nia karreta privada lori ba matebian nia rezidénsia, la’os servisu mak lakohi maibé família mak lakohi hein karreta.
“Tanba ami nia devér ne’e, só atende ema ne’ebé moras, kuandu ema ne’ebé iis laiha ona, ne’e perténsia ba sosiál nian la’os saúde, maibé parte saúde nafatin koopera, oinsa bele hetan kontaktu karreta funerariu,” nia dehan
Dirijente Saúde ne’e mós rekoñese iha sentru saúde sira laiha karreta operasionál urjente, tanba apoia ba situsaun urjénsia, maibé parte saúde sei aposta iha Planu Asaun Anuál (PAA) Orsamentu Jerál Estadu (OJE) 2026, atu koloka ba sentru saúde sira, liuliu Oésilo, Pássabe no Nítibe.
Notísia relevante:Abitante Bene-Ufe husu PA RAEOA koloka ambulánsia multifunsaun
Entretantu, matebian Vitória Tebi, moris iha aldeia Usapikolen, suku Bobometo, sub-rejiaun Oésilo. Morisa iha loron 25 Setembru 1992, no kabén ho Paulino Colo, iha oan na’in-tolu, mane ida no feto rua.
Tuir informasaun ne’ebé Ajénsia Tatoli,I.P asesu, katak iha segunda lorokraik ne’e família sira halo ona serimónia funebre hodi haloot mate-isin. iha aldeia Usapikolen.
Notísia relevante:INSPTL-PHD eleva koñesimentu parteira na’in-45 iha Oekusi
Jornalista: Abílio Elo Nini
Editór: Florencio Miranda Ximenes
