DILI, 18 Jullu 2025 (TATOLI)–Ekipa Selesaun Nasionál Timor-Leste no Portugál husi modalidade futeból prontu no preparadu ona atu kompete iha abertura jogu desportivu Komunidade Sira Nasaun Ko’alia Lian Portugés (CPLP, sigla portugés) ne’ebé sei realiza iha sábadu (19 Jullu 2025), iha Estádiu Munisipál Dili.
Notísia Relevante: Abertura jogu desportivu CPLP sei hala’o iha 19 Jullu
Asistente treinadór ekipa Selesaun Nasionál Timor-Leste, Denilson Ribeiro de Fátima Baptista, hateten, ekipa preparadu ona atu hatudu jogu ne’ebé di’ak kontra Portugál.
“Ita preparadu ona atu hatudu jogu iha aban. Matéria hotu ami fó ona ba jogadór sira, aban jogu minutu 90 iha kampu laran mak sei termina,” treinadór ne’e hateten ba jornalista sira liuhusi konferénsia imprensa ne’ebé realiza iha Sentru Konvensaun Dili (CCD, sigla portugés), sesta ne’e.
Nia dehan, nu’udár treinadór bainhira kaer ekipa ida iha ambisaun boot atu manán jogu, maibé konfiansa hotu atribui ona ba jogadór sira.
“Ita kaer ekipa, mehi atu manán. Maibé, aban buat hotu sei termina iha kampu laran ho golu hira hira ne’e, iha kampu laran mak termina,” nia tenik.
Nia hatutan, ekipa futeból iha esperansa atu hatudu rezultadu di’ak ba povu Timor-Leste hotu iha jogu referidu.
Iha fatin hanesan, kapitaun ekipa Nigo Martins hateten, preparadu ona atu kompete iha jogu ne’e no sei hatudu rezultadu ne’ebé di’ak.
“Ami preparadu ona atu hala’o jogu iha aban, buat hotu ami simu ona husi treinadór,” kapitaun ne’e tenik.
Notísia Relevante: Jogu desportivu CPLP: Entre Maskote “Ano no Anoi” ho Delegasaun Portugál
Treinadór selesaun nasionál Portugál, Pedro Alexandre Mota da Silva, hateten Portugál hakbesik kompetisaun ne’e ho sériu no ho objetivu atu promove la’ós de’it futeból maibé mós troka kulturál entre nasaun CPLP sira.
“Ami prepara ba partisipasaun ne’e hanesan kompetisaun internasionál sira seluk. Saida mak halo buat hotu espesiál liu iha ne’e mak kontestu kulturál no istóriku ne’ebé halibur nasaun luzófonu sira. Torneiu ne’e serve hodi reforsa ami-nia istória fahe no importánsia husi lian portugés,” nia hateten.
Kona-ba favoritizmu, Pedro Silva, subliña katak iha futeból ne’e laiha rezultadu garantidu.
“Portugál hakarak manán, hanesan mós Timór-Leste, maibé empata ida mós hanesan posibilidade ida. Importante mak ekipa hotu-hotu joga hodi manán, sempre ho respeitu mútuo,” nia hateten.
Treinadór portugés ne’e subliña mós katak foku prinsipál mak dezenvolvimentu husi joven atleta sira.
“Liu fali manán ka lakon, ami hakarak atu jogadór sira sai boot, hetan esperiénsia internasionál sira no aprende hosi kultura sira seluk. Rezultadu mak importante, maibé dezenvolvimentu husi atleta sira mak folin liu,” nia dehan.
Notísia Relevante: Delegasaun Portugál to’o ona iha Timor-Leste
Jornalista : Hortencio Sanchez
Editór : Cancio Ximenes
