DILI, 17 Jullu 2025 (TATOLI)—Delegasaun Portugál, kinta ne’e, to’o ona iha Timor-Leste liuhusi aeroportu internasionál Prezidente Nicolau Lobato, Comoro, Dili, ho aviaun Aero Dili 8g181 iha tuku 12h00 loron manas.
Notísia Relevante: Jogadór selesaun nasionál U-16 Portugal sei kompete iha jogu desportivu CPLP
Delegasaun husi Portugal ne’ebé to’o ona iha Timor-Leste ne’e hamutuk ema na’in-105 ne’ebé kompostu husi arbitrajen, ofisiál no atleta husi modalidade sia (9), hodi partisipa iha jogu Komunidade Sira Nasaun Ko’alia Portugés (CPLP, sigla portugés) ne’ebé sei hala’o abertura iha sábadu (19 Jullu) no sei ensera iha sábadu (26 Jullu) 2025 iha Dili.
.Bainhira to’o iha Timor-Leste delegasaun simu kedan husi ekipa protokolu Timor-Leste nian ne’ebé organiza husi Ministeriu Juventude, Desportu, Arte no Kultura (MJDAK) hodi lori kedan ba deskansa iha Ótel Timor Dili no Ótel Timor Plaza.
Bainhira hela iha Timor-Leste, treinadór husi modalidade Tenis Kampo Gonçalo Filipe Simoes sente kontente lori nia atleta mai Timor-Leste hodi partisipa iha jogu referidu no ida-ne’e sei sai hanesan esperiénsia foun ida ba nia.
“Ida ne’e hanesan jogu desportivu no kultura. Ba ha’u pesoál hanesan momentu foun no úniku tanba ha’u antes ne’e nunka mai Timor-Leste,” treinadór ne’e hateten ba jornalista sira bainhira to’o iha areoportu Dili, kinta ne’e.
Trreinadór ne’e hatutan, iha eventu ne’e nia ho komitiva sei lori rekordasaun di’ak Timor-Leste nian fila-fali ba sira-nia rai orijen hafoin eventu finaliza.
Durante jogu, nia ekipa Tenis Kampo sei hala’o jogu ho dixiplina kontra adversáriu sira no konsidera jogu ne’e importante atu troka esperiénsia ba malu hodi hametin relasaun entre membru nasaun CPLP sira.
Notísia Relevante: Preparativu ba jogu desportivu CPLP termina ona
Jornalista : Hortencio Sanchez
Editór : Cancio Ximenes
