DILI, 21 Jullu 2025 (TATOLI)—Atleta femenina husi Portugál kontinua lidera iha jogu tenis kampu hodi manán atleta femenina Timor-Leste, ne’ebé realiza iha kampu tenis A iha UNTL sentrál, iha tuku19h10 no ramata iha tuku 19h56.
Jogu ne’e lidera husi árbitu husi Angolanu, Henrique Joao, bainhira alteta femenina husi Portugál, Sofia Ferreira kontra atleta Timor-Leste, Graciabeth Valosa.
Husi jogu refere set dahuluk Portugál hetan valor 6 no Timor Leste 0, nune’e atleta timoroan esforsu atu manán iha set daruak, maibé atleta Portugál nafatin firme hodi fó vitória ba Timor-Leste liuhusi set daruak 6-0.
Nune’e, jogu modalidade tenis kampu ba loron daruak nia femenina Portugál kontinua lori vitória.
Iha oras ne’ebé hanesan, atleta femenina Portugál hasoru femenina Moçanbique iha kampu B Portugál kontinua lori vitória.
Iha kampu tenis B, atleta femenina Portugál ho naran Beatriz Angelico hasoru ho atleta femenina Mosambike ho naran Leticia Jandamel.
Atleta femenina Portugál kontinua lidera iha set dahuluk ho valór 6 no atleta femenina Mosambike 2. Iha set daruak, atleta femenina Mosambike esforsu atu manán maibé Portugál kontinua lidera ho valór 6 no Mosambike 4.
Jogu tenis kampu ne’e, lidera husi árbitu Timor Leste ho naran Frederico Soares Sarmento.
Hosi rezulatdu jogu ne’e, ekipa tenis kampu femenina husi Portugál kontinua lidera iha kampu A no B iha loron daruak nian.
Jornalista : Felicidade Ximenes
Editór : Cancio Ximenes
