DILI, 29 Jullu 2025 (TATOLI)—Diretór Servisu Apoiu Diagnóstiku no Terapéutiku iha HNGV, Vidal de Jesus Lopes, hateten durante ne’e pasiente na’in-11 mate iha Hospitál Nasionál Guido Valadares (INGV) tanba moras Raiva.
Notísia Relevante: Timor-Leste hetan apoiu doze vasina anti raiva husi Governu Indonézia
“Dadus raiva daudaun ita rejista mak pasiente ne’ebé mak mai iha HNGV lakon vida hamutuk 11, sira-ne’e hotu kuaze ita lá salva hotu,” Vidal de Jesus Lopes informa ba jornalista sira, iha nia kna’ar fatin HNGV, Bidau, ohin.
Kazu moras Raiva hamate ema iha ospitál ne’e kompostu husi Oekusi hamutuk pasiente na’in-tolu, Bobonaru na’in-rua (2), Kovalima na’in-haat (4), Ermera na’in-ida (1) no Likisa iha na’in-ida (1).
“Raiva ne’e moras públiku. Tanba ne’e, agora, parte hotu-hotu esforsu atu prevene ka hamate tiha atu labele da’et husi fatin ida ba fatin seluk. Entaun, Ministériu Saúde ho Ministériu Agrikultura, Pekuária, Peska no Floresta (MAPPF) haree asuntu sira-ne’e, tanba MAPPF haree ba asu no MS haree ba ema-ne’ebe asu tata, entaun rua ne’e tenke vasina hotu,” nia esplika.
Medida prevensaun la’o hela no parte husi INSPTL halo ona nia servisu hodi halo sensibilizasaun kona-ba moras Raiva, oinsá halo prevensaun no HNGV mós halo ona nia parte bainhira pasiente tama ona faze sintoma ne’e mobiliza fatin atu halo tratamentu sira-ne’e.
Iha fatin seluk, Diretór Aprovizionamentu Institutu Nasionál Farmásia Produtu no Mediku (INFPM), Sergio Belo, hateten iha 25 Jullu 2025 ne’e Governu Indonézia apoiu vasina antí raiva hamutuk doze 2.000 ba Governu Timor-Leste hodi halo prevensaun ba virus Raiva ihaTimo-Leste.
“Ita nia ai-moruk anti raiva kauze vial 2000 ne’ebé mak hetan apoiu husi ita-nia nasaun viziñu Indonézia. Tanba, situasaun emerjénsia ne’ebé mak ita iha ne’e mak ita nia nasaun viziñu ajuda duni ai-moruk doze 2.000, ne’ebé ami simu iha loron sesta (25 Jullu 2025) semana kotuk ne’e,” Sergio Belo hateten.
Notísia Relevante: Konfirmadu husi HNGV: Pasiente ne’ebé transfere husi Maliana mate tanba pozitivu raiva
Jornalista : Felicidade Ximenes
Editór : Cancio Ximenes
