DILI, 30 Jullu 2025 (TATOLI)—Ekipa téknika Sekretariadu Tékniku Administrasaun Eleitorál (STAE) hasoru difikuldade halo validasaun no kruzamentu dadus kartaun biométriku tanba liña internet monu, tanba ne’e presiza reforsa kapasidade internet.
“Se ha’u mai ohin rejistu, ha’u tenke halo validasaun ba ha’u-nia dadus ho sira ne’ebé mak ohin 162.483 ne’e, tanba ida-ne’e mak kada prosesu ne’e tenke halo kruzamentu ho ema ida ba ema seluk, to’o sistema hateten dehan nia la hanesan ho ema seluk, hafoin bele halo produsaun,” Diretór Jerál STAE, Elviro Fernandes Moniz, informa ba Ajénsia TATOLI, iha ninia knaar fatin, Kaikoli, Kuarta ne’e.
Nia dehan, daudaun eleitór ne’ebé mak rejistru loron-loron ne’e, kada munisípiu kuaze 200, entaun iha munisípiu 14 tanba ne’e períodu atu foti ne’e kuaze semana ida.
“Sistema mak tenke lori tempu, tanba ne’e mak labele imprime kedan, maibe tenke lori tempu semana ida, tanba sistema online, nune’e presiza halo validasaun, tanba ne’e husu eleitór sira tenke pasiénsia,” nia akresenta.
STAE munisípiu Dili nian iha informasaun tanba sei hanoin nafatin períodu ida liubá, ne’ebé sira fó durasaun tempu naruk.
“Maibé depois iha briefing ikus ne’ebé ami halo iha fulan-Jullu nia klaran, atu haree tempu ba validasaun, haree másimu semana ida nia laran, bele print ona kartaun eleitorál. Tanba ne’e mak STAE halo reforsa kapasidade internet, nomós hasa’e kapasidade servidór depois atu halo validasaun ho rápidu nune’e la presiza lori tempu naruk,” nia katak.
Notísia relevante : Semana oin STAE atribui hikas kartaun biométriku hafoin suspende fulan-rua
Lori tempu semana ida halo validasaun ba dadus eleitór tanba bainhira mai rejistu ka renova kartaun, dadus sira ne’e presiza halo kruzamentu ho eleitór sira ne’ebé renova uluk ona atu bele konfirma ema rejistadu ida de’it no labele dobru.
Presiza mós aumenta kapasidade liña internet, tanba halo validasaun presiza liña internet ne’ebé di’ak, bainhira halo validasaun hela mak internet monu bele implika ba prosesu kruzamentu dadus.
“Tanba ne’e mak bainhira ita hili opsaun ida uza biométriku ne’e, nia kestaun mak labele imprime kedan iha loron ne’e, tanba tenke halo validasaun, nomós tanba uza sistema online, ida-ne’e presiza formula barak atu lee ema nia sidik jari,” Diretór tenik.
Aleinde ne’e, eleitór ne’ebé rejistu iha sistema anteriór 925.349, ne’ebé husi númeru ne’e 162.483 (17%) mak atualiza ona ba sistema bioemétriku, entaun falta 762. 866, (82%) mak seidauk atualiza.
Eleitór foun ne’ebé rejista ona iha sistema biométriku hamutuk 18.209, entaun totál eleitór foun ho eleitór ne’ebé iha sistema tuan no eleitór ne’ebé foin rejistu ne’ebé atribui ona kartaun eleitorál ho sistema biométriku 180.692. Sistema baze dadus agora ne’e iha 942.960.
Jornlista : Osória Marques
Editora : Julia Chatarina
