OEKUSI, 31 Jullu 2025 (TATOLI) – Komisaun Funsaun Públika (KFP) iha Rejiaun Administrativa Espesiál Oekusi Ambeno (RAEOA), fó-sai sirkulár ofisiál ida ba Sekretáriu sira inklui Gabinete Prezidente Autoridade atu suspende rekrutamentu funsionáriu foun iha Oekusi.
Notísia relevante:KFP prioriza reforma administrasaun públika-halo rekrutamentu funsionáriu foun iha 2025
Karta sirkulár ne’ebé Ajénsia Tatoli, I.P asesu, ho númeru referénsia 52/RAEOA-TL/SRA-DRFP/2025 ho asuntu enkamiñamentu sirkulár Komisaun Funsaun Públika kona-ba suspensaun rekrutamentu funsináriu públiku.
Dokumentu ofisiál husi karta sirkulár mak, konsidera katak iha responsabilidade Komisaun Funsaun Públika nian atu determina abertura ba rekrutamentu ba karreira funsaun públika, no mós selesaun bazeia ba méritu ba pozisaun diresaun no xefia nian, tuir artigu 90. 2 hosi dekretu-lei númeru 22/2011, loron 08 fulan-Juñu.
Konsidera mós katak KFP responsavel atu hala’o rekrutamentu, nomeasaun, no promosaun sira, tuir alinea a husi artigu 90. 2 husi artigu 50.o husi lei númeru 7/2009, loron 15 fulan-Jullu, ne’ebé kria KFP nian.
Konsidera kreximentu desordenadu iha forsa traballu instituisaun administrasaun públika nian, ne’ebé implika aumentu iha dimensaun funsaun públika no despezas iha Orsamentu Jerál Estadu anuál.
Konsidera katak aumentu iha númeru funsionáriu públiku no ajente administrasaun públika tenke rezulta husi análize kle’an kona-ba nesesidade serbisu instituisaun sira-nian, bazeia ba kualitativu no kuantitativu.
Konsidera argumentu sira-ne’ebé aprezenta iha leten no bazeia ba KFP nia kbiit ne’ebé define ona iha lei sira-ne’ebé identifika iha leten, mak primeiru atu determina suspensaun ba prosesu rekrutamentu ba funsionáriu públiku sira.
Daruak, determina adosaun estratéjia mobilidade pesoál hanesan dalan ida atu hatán ba nesesidade pesoál nian, tan ne’e husu ba instituisaun sira atu halo komunikasaun no koordenasaun ba malu hodi hatán ba nesesidade instituisaun sira-nian.
Datoluk, karik iha nesesidade atu priénxe vaga, sei prienxe uluk ho opsaun rua, karik nesesidade persiste, instituisaun sei husu ba KFP atu adota estratéjia nesesária hodi prienxe ou rekrutamentu ka kontratasaun.
Dahaat, karik iha nesesidade ba pesoál atu priénxe vaga ka tanba serbisu, instituisaun tenke halo koordenasaun ho KFP hodi avansa prosesu rekrutamentu ba ajente administrasaun públika hodi hatán ba nesesidade.
Ikulius, suspensaun ba prosesu rekrutamentu ne’e, hahú iha data sirkulár ida-ne’e nian, no sei kontinua ba périodu nesesáriu atu fó dalan ba análize reforma funsionáriu públiku nian iha instituisaun administrasaun públika sira.
“Informasaun ne’e ita fó-sai, no enkamiña ona ba Sekretáriu Rejionál na’in-neen iha Oekusi, tanba tuir loloos implementa iha 2025 ne’e tanba Planu Asaun Anuál, idak-idak aposta iha tinan ne’e, maibé foin daudaun Konsellu-Ministru kansela temporaria, la’ós ba Oekusi de’it maibé territóriu. Entaun, ita fó sai sirkulár atu kada Sekretáriu Rejionál idak-idak labele halo rekrutamentu foun ba funsionáriu,” informa Diretór Komisaun Funsaun Públika Oekusi, Domingos Punef ba Ajénsia Tatoli iha Oekusi, ohin.
Notísia relevante:Autoridade RAEOA kansela rekrutamentu ofisiál apoia iha Kutete no Monemeko
Nia esplika, sirkulár anúnsia atu supende rekrutamentu funsionáriu foun, ho objetivu atu hadi’a jestaun sistema administrativamente iha Komisaun Funsaun Públika, bainhira hadi’a hotu ona, depende fali husi polítika Governu liuhusi desizaun Konsellu-Ministru, bele akontese iha tinan ne’e no bele 2026.
Maibé, espesialmente ba Oekusi nian, kada Sekretáriu Rejionál sira no diresaun hotu, prepara ona, tanba orsamentu ba rekrutamentu prevee kedas iha Planu Asaun Anuál (PAA) Orsamentu Jerál Estadu (OJE) 2025 nian.
Notísia relevante:KFP realiza ezame promosaun grau ba funsionáriu 364 iha Oé-Cusse
Entretantu, totál funsionáriu ativa ba permanente iha Oekusi hamutuk 1.412 komposta husi mane 912 no feto 500, funsionáriu kazuál ho termu sertu hamutuk 1.086 komposta husi feto 293 no mane 793.
Jornalista: Abílio Elo Nini
Editór: Rafael Ximenes de A. Belo
