OÉ-CUSSE, 16 Dezembru 2024 (TATOLI) – Komisaun Funsaun Públika (KFP) realiza, ohin, ezame promosaun karreira hodi hasa’e nivel husi A to’o F ba funsionáriu 364 iha Rejiaun Administrativa Espesiál Oé-Cusse Ambeno (RAEOA).
Ezame promosaun karreira ba funsionáriu públiku sira ne’e ba rejime jerál administrasaun públika daneen ho tema “Valorizasaun no melloramentu karreira hodi fó prestasaun servisu ho kualidade”.
Iha abertura, Vise-Ministru Asuntu Parlamentár, Aderito Hugo da Costa, apresia ba KFP nia inisiativa, tanba hakbesik liu prosesu sira-ne’e ba iha baze, liuliu fornese oportunidade sira, nune’e hetan partisipasaun máxima husi funsionáriu sira-ne’ebé hakarak tuir iha promosaun grau sira.
“Ita apresia no konkorda ho medida Komisaun Funsaun Públika hodi fornese teste sira-ne’e iha nivel rejiaun, ne’e di’ak tebes. Ha’u reprezenta Governu apoia inisiativa ne’e atu halo ona teste promosaun grau nivel rejiaun sira husi leste, súl, oeste inklui Oé-Cusse. Ida-ne’e parte husi polítika Nonu Governu hamutuk ho mandatu Komisaun Funsaun Públika nian ba tinan haat tuirmai”, nia dehan iha salaun administrasaun Numbei-Oé-Cusse, ohin.
Governante konsidera teste promosaun ne’e introdús ona medida sira atu halo tranzisaun desentralizasaun administrativa ne’ebé tama ona programa Governu nian atu munisípiu no rejiaun ne’ebé preparadu bele tama ona ba prosesu eleisaun kámara munisipál no desentralizasaun administrativa, inklui podér lokál tuir planu Governu nian ne’ebé iha.
Prezidente KFP, Agostinho Letêncio de Deus, dehan teste promosaun ne’e kompostu husi funsionáriu 364 mai husi grau B ba A, grau C ba B, husi D ba C, husi E ba D, husi F ba E no husi grau G ba F.
“Ohin, ezame promosaun pur méritu liuhusi komputadór, ida-ne’e foin dahuluk ita hala’o iha Oé-Cusse, maibé hanesan mós teste ida atu ita bele halo mós iha parte hotu. Ita hanoin hela atu susesu husi teste ida-ne’e implementa mós iha rejiaun seluk iha rai boot ne’ebá”, nia hateten.
“Ida-ne’e atu hatudu katak, Governu mai ho polítika ne’ebé aposta ba Governu elétroniku, tan ne’e mak prosesu ne’ebé ita hala’o daudaun ne’e rezultadu husi polítika Government eletronic, katak sistema sira la’o di’ak ona, funsionáriu sira-bele teste iha fatin ne’ebé besik, la presiza konsentra hotu iha Dili”, hatutan.
Notísia relevante: Rejime foun permite funsionáriu públiku grau ki’ik bele asume kargu dirijente temporáriu
Teste promosaun ne’e realiza durante loron tolu, hahú iha 16 no sei termina iha 18 Dezembru 2024.
Jornalista: Abílio Elo Nini
Editóra: Maria Auxiliadora
