DIILI, 10 janeiru 2024 (TATOLI)—Governu liuhosi reuniaun Konsellu Ministru (KM) ordinária, kuarta ne’e, aprova ona projetu dekretu-lei ne’ebé aprezenta hosi Ministru Prezidénsia Konsellu Ministru, Agio Pereira no Prezidente Komisaun Funsaun Públika, Agostinho Letêncio de Deus, kona-ba rejime kargu diresaun no xefia iha administrasaun públika.
“Objetivu alterasaun lejizlativa ida-ne’e atu halo flesibilidade ba regra sira hodi permite katak funsionáriu públiku ho grau ki’ik liu mós bele asume kargu dirijente ho temporáriu, naran katak hatudu esperiénsia profisionál iha área korrespondente,” refere nota ne’ebé Agência Tatoli asesu hafoin reuniaun ezekutivu, iha Palásiu Governu.
Notísia relevante : Komisaun A husu KFP hadi’a mekanizmu teste promosaun ba funsionáriu públiku
Inisiativa ne’e mosu tanba Governu nota katak daudaun ne’e regra sira ne’ebé vigora ezije katak kandidatu ne’ebé atu okupa kargu dirijente tenke enkuadra iha kategoria ruma no grau espesífiku karreira rejime jerál nian, ne’ebé dalaruma hamosu difikuldade iha prienximentu pozisaun sira, tuir keixa ne’ebé aprezenta beibeik hosi liña ministeriál sira.
Diploma ne’e define mós katak substituisaun ba kargu dirijente tenke dezempeña hosi funsionáriu públiku, la inklui posibilidade nomeasaun temporáriu hosi ajente administrasaun públika.
Jornalista : Antónia Gusmão
Editora : Julia Chatarina
