DILI, 31 Jullu 2025 (TATOLI) – Ministériu Finansa hasai ona sirkulár hodi organiza reuniaun Komite Revizaun Orsamentu (KRO) ba preparasaun Orsamentu Jerál Estadu 2026 ne’ebé sei hahú entre loron 05 no 23 Agostu.
Tuir nota ne’ebé Tatoli asesu, atu asegura entidade sira-nian preparasaun, maka Ministeriu Finansa hakarak sirkula detalla kalendáriu reuniaun KRO ne’e ba liña Instituisaun Servisu Sem Fundu Autonóma (SSFA), Servisu Fundu Autónoma (SFA), instituisaun Estadu, munisípiu sira no responsabilidade Asosiasaun Defisiente hodi prepara aan.
“Konsidera reuniaun ne’e importante tebes, hakarak konvida señor membru Governu, autoridade RAEOA, responsavel husi instituisaun Estadu, responsavél husi Ajénsia Públika Autónoma, Autoridade Munisípiu atu fó importánsia halo diskusaun ho membru Komité Revisaun Orsamentu. Nune’e, hodi hetan konsiderasaun finál ba ita-boot sira-nia Orsamentu Jeral Estadu 2026”, refere dokumentu ne’e.
Iha loron 05 Agostu, Ministériu ne’ebé sei partisipa uluk iha KRO mak Ministériu Edukasaun, Ministériu Juventude Desportu, Arte no Kultura, Ministériu Ensinu Superiór Siénsia no Kultura, Ajénsia Nasionál Avaliasaun no Akreditasaun, Institutu Nasionál Siénsia no Teknolojia, Universidade Nasionál Timor Lorosa’e no Institutu Politékniku Batanu (IPB).
Tuir mai, Ministériu Solidaridade Sosiál no Inkluzaun, Institutu Nasionál Seguransa Sosiál no seluk tan.
Ba entidade tutela direta ba Estadu sei hala’o iha loron 22 Agostu mak hanesan Prokuradoria Jerál Repúblika, Provedoria Direitu Umanu no Justisa, Komisaun Funsaun Públika, Konsellu Imprensa, Komisaun Nasionál Eleisaun, Prezidénsia Repúblika, Parlamentu Nasionál no Tribunál.
Enkuantu iha loron 23 Agostu 2025, partisipa husi Gabinete Primeiru-Ministru ho nia tutela sira.
Dezisaun finál ba orsamentu rekorrente, kapitál sira no dezisaun finál ba totál orsamentu sei hala’o loron lima husi 25 to’o 29 Agostu 2025.
Notisía relevante: Tetu indikativu ba OJE 2026 hamutuk billaun $1,85
Jornalista: Arminda Fonseca
Editora: Maria Auxiliadora
