OEKUSI, 31 Jullu 2025 (TATOLI) – Koordenadór Defensoria Públika iha Rejiaun Administrativa Espesiál Oekusi Ambeno (RAEOA) Afonso Gomes Fatima, informa katak transporte no rekursu umanu liuliu defensór sai difikuldade iha serbisu administrasaun edifísiu Defensór Públiku Oekusi.
“Ami-nia karreta iha rua de’it, ida funsiona hela ida fali hadi’a ona maibé nia roda sira mak mihis, tanba karreta ne’e uza ba operasionál, entaun sai difikuldade mai ami, kuandu iha inspesaun ba lokál krime ruma, difikulta ami liuliu iha Pássabe Nítibe no Oésilo, entaun presiza karreta hanesan Hilux mak foin bele asesu to’o área rurál sira,” nia informa iha ámbitu enkontru ho Prezidente Autoridade RAEOA Rogério Tiago Lobato, edifisíu Defensória Públiku Oekusi, ohin.
Notísia relevante:Lúcia Lobato rekolla preokupasaun Autoridade Judisiáriu Oé-Cusse hodi aprezenta bá Primeiru Ministru
Problema seluk ida ne’ebé mak nia hato’o iha sorumutu ofisiál ne’e mak rekursu umanu; antes ne’e iha defensór na’in-tolu, maibé agora ida ba pozisaun seluk ona iha Autoridade RAEOA, nune’e hela na’in-rua, ho ofisiál justisa na’in-tolu ho sekretária, motorista ida no pesoál limpeza (Cleaner) ida maibé husi kompañia.
Nia informa, maske defensór na’in-rua de’it, maibé la hamate espiritu serbisu, tanba dalaruma kuandu iha arguidu barak, mosu konflitu interrese, tan ne’e tenke presiza defensór ida tan, tanba kuandu defensór ida ba enkontru iha Dili, ka asuntu família ka kondisaun saúde, entaun defensór públiku na’in-ida de’it labele akumula serbisu barak, ba kazu krime, defensór ida mós bele responde, maibé iha julgamentu ba kazu sívil entaun presiza ema na’in-rua.
“Problema rua ne’e transporte ho rekursu umanu mak sai problema iha Defensór Públiku Oekusi, dalaruma iha problema hanesan saúde ka asuntu família, entaun julgamentu ba kazu sívil ne’e labele realiza tanba defensór ida laiha, bele kansela,” nia énfaze.
Notísia relevante:Ministru Sérgio ho PA REAOA diskute atu mellora setór justisa iha Oekusi
Hatan ba rekomendasaun sira-ne’e, Prezidente Autoridade RAEOA, Rogério Lobato, promete sei koordena ho Ministériu Justisa atu konsidera, maibé kona-ba transporte Autoridade RAEOA sei apoia, importante submete proposta.
“Ha’u mai vizita imi, tanba Defensór Públiku nia papél importante iha setór justisa, atu defende ema ne’ebé laiha meiu atu selu advogadu privadu. Ha’u hanesan Prezidente Autoridade iha Oekusi, ha’u tenke hatene imi-nia problema, nune’e ha’u bele ko’alia ho Ministru Justisa atu haree asuntu sira hanesan ne’e. Maibé, kona-ba transporte, Autoridade sei apoia uitoan, maibé importante mak tenke hakerek surat mai ha’u, ne’e mak ohin ha’u mai atu haree ho matan loos ka la’e, ne’ebé semana ne’e bele hato’o karta, saida mak imi presiza atu tau matan,” nia dehan.
Notísia relevante:Enkontru kortezia ho PA RAEOA, Juís tribunál Oekusi aprezenta problema rua
Jornalista: Abílio Elo Nini
Editór: Rafael Ximenes de A. Belo
