DILI, 01 Agustu 2025 (TATOLI)—Kapitán ekipa husi jogadór Selesaun Nasionál Futeból Feminina Timor-Leste, Dolores Viana da Silva garante sei hatudu performance di’ak bainhira partisipa jogu Asian Football Federation (AFF) ne’ebé sei realiza iha Vietnam.
Dolores hateten maski kompetisaun iha rai-laran ba kategoria feminina sei menus maibé progresu dezenvolvimentu futeból feto iha Timor-Leste hahú hatudu mudansa nune’e liuhosi jogu internasionál sira la’ós ona partisipa de’it maibé iha ona ambisaun atu gaña rezultadu.
“Ha’u-nia esperansa bele iha performance di’ak nune’e bele gaña rezultadu pozitivu ba ekipa nasionál no nasaun,” kapitán ekipa seniór Selesaun Nasionál Futeból Feminina informa ba TATOLI iha Bairros dos Grilos, Sesta ne’e.
Dolores Viana lori jogadór sira-nia naran hato’o agradesimentu ba Federasaun Futeból Timor-Leste (FFTL) liuliu Asosiasaun Futeból Feminina (AFF) ne’ebé fó oportunidade atu reprezenta nasaun hodi kompete iha jogu AFF Women’s Championship.
Notísia relevante: Selesaun Nasionál Futeból Feminina sei partisipa jogu AFF Championship no AFC Cup U-20
Nia kompromete katak sei hatudu disiplina no serbisu ekipa inklui esforsu maka’as liután hodi gaña rezultadu iha kompetisaun referida.
“Bainhira ita serbisu, rona no kolabora hamutuk, ha’u hanoin katak sei halo ekipa ne’e sólida liután hodi lori futeból sai orgullu nasionál,” Dolores subliña.
Entretantu, ekipa feminina seniór sei aranka bá Vietnam iha loron-05 Agustu no sei kolokadu iha grupu B hamutuk ho nasaun tolu seluk hanesan Austrália, Myanmar no Filipina, iha ne’ebé sei hahú jogu dahuluk kontra Filipina iha loron-07 Agustu.
Jornalista: Natalino Belo
Editór: Xisto Freitas da Piedade
