OEKUSI, 14 Agostu 2025 (TATOLI) – Vise-Ministru ba Fortalesimentu Institusionál, José dos Reis Magno, hamutuk Ho Sekretáriu Rejionál ba Asuntu Saúde, Luís de Jesus Neno, kinta ne’e, lansa programa Kuidadu Saúde Família liuhusi distribuisaun ai-moruk albendazole ba estudante sira iha Eskola Bázika Filiál (EBF) 30 Agostu Masin, sub-rejiaun Rejiaun Administrativa Espesiál Oekusi Ambeno (RAEOA) hodi prevene moras lumbriga ba labarik sira-nia isin.
Notísia relevante:RAEOA lansa distribuisaun ai-moruk albendazole atu prevene moras lumbriga
Programa ne’e hetan apoia husi Organizasaun Saúde Mundiál (OMS), Fundu Dezenvolvimentu Nasaun Unida ba Labarik (UNICEF, sigla inglés) no Ajénsia Internasionál Koperasaun husi Korea Súl (KOICA, sigla inglés) no Ministériu Saúde mak implmenta iha Timor-Leste.
Programa ne’e fokuliu ba pakote Kuidadu Saúde Primaria nakait ho Projetu Dehan Lae ba 5S signifika kona-ba Hamlaha, Lumbriga ne’ebé da’et husi rai, Moras kulit, Fuma, no Bebidas midar/alkóliku iha Timor-Leste
“Ohin ita simbólika fó albendazole ba oan sira iha EBF Masin, ne’e importante tanba ita-nia oan sira idade sei ki’ik, gosta han buat ne’ebé midar depois ho ambiénte ladún moos, entaun ita distribui ai-moruk no enkoraza sira, katak antes han buat ruma presiza fase liman ho sabaun, tanba lumbriga espalla hela, ita la haree ho matan, entaun kada fulan neen Ministériu Saúde distribui ai-moruk atu bele prevene moras lumbriga ne’ebé iha isin lolon,” Vise-Ministru ba Fortalesimentu Institusionál, José dos Reis Magno, ba jornalista sira iha Oekusi, iha sentru saúde Kiomaonteko, ohin.
Notísia relevante:Tinan ne’e, Servisu saúde Oé-Cusse mellora atendimentu ba pasiente moras hada’et
Sekretáriu Rejionál ba Asuntu Saúde, Luís de Jesus Neno, hateten, programa distribuisaun ai-moruk albendazole ne’e, alvu ba estudante 22.686 mai husi eskola 98 iha Oekusi no priodade liu ba labarik idade tinan-neen (6) to’o tinan 14.
“Programa ida-ne’e kada tinan ita hala’o, tanba moras ida-ne’e sempre akontese iha ema hotu, tantu labarik no adultu, maibé agora ita fó liu ba labarik sira atu prevene moras lumbriga, tanba ho ai-moruk albendazole bele prevene sira, atu fó isin di’ak, no programa ne’e abertura tarjetu ba estudante 22.686, mai hosi eskola 98,” nia hateten.
Iha biban ne’e, Koordenadór EBF 30 Agostu Masin, Belarmino Beto, orgullu, tanba tinan ne’e Governu hili EBF 30 Agostu atu halo lansamentu.
“Programa ne’e konstinuasaun husi 2024 nian, ne’ebé tinan kotuk lansa iha EBC Palaban, agradese ohin bele mai lansa iha ne’e, ne’ebé ha’u espera ho programa ne’e, estudante sira bele prevene moras lumbriga ba ita-nia oan sira, tanba hanesan futuru nasaun, entaun komesa agora ita tenke trata no hadi’a sira-nia saúde di’ak,” nia dehan.
Notísia relevante:Servisu Saúde Oé-Cusse rejista pasiente TBC 102 no hitu lakon vida
Entretantu, iha ámbitu lansamentu distribuisaun ai-moruk albendazole ne’e, hetan observasaun husi parsériu sira hanesan, Organizasaun Saúde Mundiál (OMS), Fundu Dezenvolvimentu Nasaun Unida la (UNICEF), no Ajénsia no Ajénsia Internasionál Koperasaun husi Korea Súl (KOICA, sigla inglés).
Jornalista: Abílio Elo Nini
Editór: Rafael Ximenes de A. Belo
