Alkatiri: Sai forsa atu proteje povu la’ós kontra povu
DILI, 20 Agostu 2025 (TATOLI)—Sekretáriu Jerál partidu Frente Revolusionária Timor-Leste Independente (FRETILIN) no eis titulár, Mari Alkatiri, hateten sai forsa no polísia atu proteje povu la’ós kontra povu.
Notísia Relevante: Tinan 50 reflete loron FALINTIL, estudante tenke sai kontinuadór
“Ha’u rekoñese katak iha dezenvolvimentu atu sai husi forsa gerilla ba forsa regulár ne’e esperiénsia husi fatin hotu-hotu ne’ebé susar tebes, maibe dixiplina institusionál iha gerillia ne’e depende ba komandu katak mandatu dehan oho ne’e oho,” Sekretáriu Jerál FRETILIN ne’e relata ba jornalista bainhira hato’o nia mensajen ba selebrasau loron FALINTIL ba da-50, iha ninia rezidénsia, Faról, tersa ne’e.
Nia hateten, kona-ba dixiplina institusionál forsa regulár ne’e depende komandu husi instituisaun ida-nian.
“Ha’u mós rona katak forsa armada barak sei sei reformadu, nune’e jerasaun presiza prepara-an hodi kontinua sai seguransa no proteje ba rai no povu,” nia hateten.
Nia afirma, tempu formasaun agora ne’e ba joven sira tenke regulár ho valór patriotizmu tenke iha nafatin, tamba F-FDTL haree la’ós atu kontra povu maibé atu proteje povu.
Nune’e mós hanesan ita harii Polísia Nasionál Timor-Leste la’ós atu halo presaun ba povu maibé atu proteje povu, nune’e buat sira-ne’e hotu depende ba polítika ukun nain ninian.
“Agora uza polísia no forsa hodi kontra fali ema ki’ak ne’e mak ha’u la konkorda, ne’e halai dook ona husi valór no prinsípiu uluk funu nian,” nia hateten.
Notísia Relevante: Falur konsidera FALINTIL nu’udár identidade Timor-Leste
Jornalista : Alexandra da Costa
Editór : Cancio Ximenes
