DILI, 21 Agostu 2025 (TATOLI)-Governu sei lansa utilizasaun ba funsionamentu kabu fibra ótika iha trimestre dahaat tinan-ne’e.
“Trimestre dahaat tinan ida-ne’e nian, ita koko atu lansa ona”, Ministru Transporte Komunikasaun (MTK), Miguel Manetelo, hateten ba jornalista sira iha Sentru Konvensaun Dili, kinta-ne’e.
Notísia relevante: Governu hein promulgasaun dekretu-lei kona-ba kriasaun no estatutu CTL hosi PR
Governu halo prosesu atu haree gateway iha CLS iha Bebonuk. Tanba kontentór-ida ne’ebé daudaun monta iha Bebonuk ne’e simu ligasaun husi VOCUS. “Agora prosesu halo, husi ne’eba distribui ba instituisaun Governu, liliu seguransa, defeza, tanba ha’u dehan lansa iha trimestre ikus dahaat tinan ida nian, ba públiku bele uza”, ministru salienta.
Governante ne’e dehan, semana hirak liuba komisaun instaladora Cabos de Timor-Leste, Empreza Públika (CTL, E.P) hala’o ona konsultasaun ho operadór telekomunikasaun sira atu sosa ba utilizasaun kabu ne’e rasik.
MTK hamutuk Ministériu Planeamentu no Investimentu Estratéjiku (MPIE) no tékniku husi empreza Alcatel Sumbarine Network (ASN) Marsu liubá halo ona teste ho rezultadu di’ak ba kabu submarinu fibra óptika (ligasaun internasionál) iha cable landing station Bebonuk Dili.
Notísia relevante: MTK no empreza ASN halo ona teste ba kabu submarinu iha Bebonuk
Jornalista : Nelson de Sousa
Editora : Rita Almeida
