DILI, 21 Agostu 2025 (TATOLI)–Governu Nova Zelándia hatudu filafali ninia kompromisu hodi apoia dezenvolvimentu rekursu umanu Timor-Leste nian hodi hasa’e númeru bolsa estudu kompletu Manaaki Nova Zelándia, husi kuota antes ne’e 12 ba 32, ba estudante timoroan, hahú iha tinan akadémiku 2026.
Embaixadora Nova Zelándia iha Timor-Leste, Helen Tunnah, hato’o asuntu ne’e durante nia diskursu iha serimónia asinatura Entendimentu Operasionál Inter-Ajénsia (IAOU) entre Governu Timor-Leste no Nova Zelándia.
“Durante tinan 10, ami ajuda hadi’a asesu ba ensinu pré-eskolár, dezde 1991 molok ukun-an, ami oferese ona bolsa estudu. Tinan ida-ne’e, ami sente orgullu hodi aumenta númeru bolsa estudu Manaaki husi 12 ba 32, no ami kontinua halo ida-ne’e kada tinan,” Embaixadora Helen Tunnah hateten, iha salaun VIP Sekretaria Estadu Formasaun Profisionál no Empregu (SEFOPE), Kinta ne’e.
Notísia relevante : Nova Zelándia sei anúnsia aumenta númeru bolsa Estudu ba timoroan
Nia dehan, daudaun ne’e estudante timoroan na’in-75 mak partisipa iha programa formasaun oioin iha Nova Zelándia, inklui bolsa estudu kompletu, formasaun ba tempu badak, no formasaun lian Inglés.
Bolsa Estudu Manaaki Nova Zelándia 2025 taka iha Fevereiru 2025 no sei hahú iha semestre dahuluk tinan akadémiku iha Fevereiru 2026 nian. Aplikasaun sira loke ba lisensiatura no doutoramentu. Kampu estudu sira inklui siénsia, teknolójia, enjiñaria, arte, dezeñu, negósiu, no umanidade sira.
“Bolsa estudu ida-ne’e kobre benefísiu oioin, inklui propina kompletu, subsídiu mensál ba moris, pasajen aviaun ida-idak, seguru saúde, no apoiu ba dezenvolvimentu akadémiku no pesoál. Rekezitu prinsipál ida ba partisipasaun iha programa ida-ne’e maka sertifikadu IELTS ho pontuasaun mínimu 5.0, ne’ebé fó sai la liu tinan rua antes inskrisaun,” nia tenik.
Aleinde ne’e, Nova Zelándia mós oferese eskema bolsa estudu balun seluk ba Timor-Leste, inklui Bolsa Estudu Formasaun ba Tempu Badak ba Pasífiku no Sudeste Aziátiku no Bolsa Estudu Nova Zelándia Formasaun Lian Inglés ba Funsionáriu sira (NZELTO).
Antes ne’e, iha tinan 2023, eis Embaixadór Nova Zelándia iha Timor-Leste, Philip Hewitt, afirma katak iha maizumenus estudante Timor-Leste hamutuk 300 resin mak estuda iha Nova Zelándia.
Jornalista : Arminda Fonseca
Editora : Julia Chatarina
