DILI, 25 Agostu 2025 (TATOLI)-Xefe Estadu Maior Forsa Armada, Brigadeiru Jerál José da Costa Soares “Trix”, hatete Komandu F-FDTL sei investiga kazu asidente tránzitu iha Oekusi ne’ebé rezulta membru husi Komponente Navál na’in-ualu.
“Membru sira ne’ebé hetan asidente foin daudaun, balun ba fali ona postu, atu dehan sira na’in hira ne’ebé mak hetan asidente ne’e sira-nia saúde di’ak, maibé Komandu tenta atu halo investigsaun profundu no ba aban bain-rua atu toma desizaun ne’e mak ita sei halo prosesu”, Trix hatán ba jornalista sira hafoin loke ezersísiu Harii Hamutuk ba dala-13 ne’ebé halo iha Sentru Instrusaun Komandante Nicolau Lobato Metinaru, segunda-ne’e.
Nia dehan, Komandu F-FDTL nian D2, D4 no Justisa oras ne’e iha ona terenu hodi halo investigasaun klean ba asidente ne’e.
Trix hateten Komandu seidauk bele pronúnsia buat ruma ba kazu ida-ne’e, tanba sei hein prosesu investigasaun.
“Atu hatene ida-ne’e mak ha’u haruka ona ekipa investigasaun para sira ba halo apuramentu, atu hetan ninian verdade. Ha’u labele ko’alia arbiru de’it, ha’u ko’alia arbiru ne’e la-di’ak, kuandu iha ona evidensia mak ha’u bele ko’alia ida-ne’e mak importante”, nia konklui.
Notísia relevante: Membru F-FDTL na’in-ualu hetan asidente iha Nítibe, na’in-tolu kanek todan
Jornalista : Natalino Costa
Editora : Rita Almeida
