DILI, 30 Agostu 2025 (TATOLI)—Ministru Komérsiu no Indústria, Filipus Nino Pereira hateten, Dili Internasionál Trade Expo (DITE) 2025 ne’ebé realiza iha Dili, fó benefísiu tebes tanba bele promove produtu Timor bá mundu internasionál liuhusi espozisaun.
“Liuhusi expo internasionál ho hanoin ida atu promove Timor-leste bá mundu. Expo hanesan eventu internasionál atu hatudu produtu Timor bá mundu no fasilita mós mensajen pozitivu no imajen Timor-Leste nian bá mundu,” Ministru Nino Pereira hato’o liuhusi Talkshow ne’ebé realiza Sentru Konvensaun Dili (CCD, sigla portugés), iha ámbitu DITE 2025, Sábadu kalan.
Nia dehan, DITE ne’ebé realiza iha Timor-Leste ne’e mós iha eventu ligadu ho komorasaun loron 30 Agostu Konsulta Populár ba dala-XXVI ho nia tema ‘Lori Timor bá Mundu’ tanba iha hela ámbitu komemorasaun loron istóriku ne’e.
“Liuhusi ita-nia feira internasionál ba komérsiu ida-ne’e, atu aproveita katak Timor-Leste nasaun ida-ne’ebé joven nakonu ho poténsia iha setór hotu, populasaun 70% mak nakonu ho foin-sa’e sira, nune’e bainhira ita aproveita ho di’ak oportunidade sira, ita-nia joven sira sei lori benifísiu boot ba nasaun,” nia akresenta.
Notísia relevante : Stand 250 husi nasaun partisipante iha Dili Trade Expo
Maibé atu dezenvolve setór sira, Governante ne’e husu ba joven sira atu prepara-an liuhusi talentu ne’ebé hatene ko’alia dalen oioin, kreatividade, no inovativu nune’e bele lori Timor bá mundu.
“Ohin loron ita moris iha ambiente ne’ebé liberdade no esforsu hotu Estadu halo ona maibé Estadu mesak labele, tenke apoiu husi setór privadu, públiku no kooperativa serbisu hamutuk hodi dudu ita-nia ekonomia bá oin,” nia subliña.
Governante ne’e katak, expo internasionál ne’e hanesan lisaun ida ba mikro, pekena, médiu empreza sira atu nune’e bele apreende ho emprezáriu intenasionál sira oinsá bele dezenvolve negósiu sira ho inovativu.
“Ita ko’alia kona-ba negósiu ne’e buat fásil maibé atu sai negósiu ne’ebé maduru no atu sai emprezáriu ne’ebé maduru tenke esforsu atu apreende ho sé de’it tanba atu susesu iha negósiu la’ós hanesan milagre ida mosu de’it,” Ministru tenik
Nia dehan tan, Ministériu Komérsiu no Indústria (MKI) iha obrigasaun morál atu transforma no halo dezenvolvimentu ba mikro no pekena empreza nune’e nafatin fó dala joven sira hodi halo atividade atu hakle’an tan sira-nia konesimentu ba vida emprezáriu ninian.
“Governu nafatin fó apoiu ba sira atu kontinua fortifika sira-nia an iha vida emprezariál ninian hodi hametin liután sira-nia votade atubele kontibui ba ita-nia dezenvolvimentu,” nia hato’o.
Nune’e mós, Prezidente Kámara Komérsiu no Indústria (CCI-T, sigla portugés), Jorge Manuel Serrano konsidera, eventu DITE 2025 ne’e importante tebes tanba setór privadu sira tenke dezenvolve-an
Serrano nota, Timor iha ona produtu lokál barak, tanba ne’e ba oin presiza halo sertifikasaun ba kualidade no orijen produtu nian nune’e produtu lokál bele kompete iha merkadu internasionál.
“Feira ida-ne’e entidade internasionál sira partisipa ho di’ak tebes, tanba partisipa diretamente husi ita-nia produtór ka emprezáriu nasionál sira ho produtu rasik, dalabarak ita haree produtu barak mai husi li’ur maibé agora ita haree, ita mós iha produtu rasik, ida-ne’e fó ona esperansa ida katak timoroan bele tama daudaun ona área ida-ne’e, neineik maibé sei beibeik”,” Jorge Serrano tenik.
Nia dehan, expo ne’e iha vantajen boot ba emprezáriu timoroan sira tanba iha vida negósiu tenke koñese malu no sasán.
“Ida-ne’e forma ida atu koñese sasán, katak sira mai koñese ita-nia sasán no ita mós koñese sira-nia sasán, maski sira-nai produtu ne’e barak mak importa ona mai ita-nia nasaun, maibé ita buka nafatin halo interkámbiu negósiu. Dalabarak eventu sira hanesan ne’e, Timor-Leste mak sempre bá rai-li’ur maibé hanoin katak tempu ona bele halo mós iha rai-laran nune’e bele atrai investidór barak mai investe,” emprezáriu ne’e motiva.
Produtu Timor-Leste ne’ebé aprezenta iha espozisaun ne’e mak hanesan kafé, kakau, ai-kameli, artezanatu, tais, no seluk tan.
Aleinde ne’e, MKI prepara stand hamutuk 250, ne’ebé okupa husi nasaun sia hanesan Tailándia, Xina, Makau, Índia, Fiji, Indonézia, Austrália Singapura, Brunei Darussalam no Kamboja.
Jornalista : Arminda Fonseca
Editora : Julia Chatarina
