BOBONARU, 01 setembru 2025 (TATOLI) –Tuir rezultadu monitorizasaun no supervizaun husi ekipa tékniku Ministériu Obras Publika (MOP) destakadu Munisípiu Bobonaru nota katak implementasaun projetu reablitasaun estrada Urbana Maliana vila pakote I no II hatudu progresu di’ak,tanba empreza konstrutota Hutama Karya (HK) no Bina Mitra hahú aselera servisu.
Koordenadór Infraestrutura MOP Munisípiu Bobonaru, Fernando de Fátima konfirma, progresu fizíku atuál husi empreza HK nia atinje ona 56% no Bina Mitra Indoh Sejatera (BMS) 32%.
Notisía relevante:Governu hatuur fatuk dahuluk ba projetu reabilitasaun estrada urbana Maliana pakote I
“Husi fulan-janeiru mai to’o iha ne’e,nia progresu ne’e agora di’ak. Servisu mós komesa la’o ho di’ak. Ita hotu hare Aspal, agora sira komesa haka’as. Ne’ebé, progesu ba Hutama Karya (HK) nia ne’e agora tama ona ba 56,63%. Ba Bina Mitra nia progresu to’o ona 32,39%,ne’e Ministeriu iha ne’e ita atu aselera uituan kompaña nia servisu. Ita-nia target (alvu) ne’e tinan ida-ne’e bele ramata,maibé tuir ita-nia haree setidaknya tama iha fulan-novembru ho dezembru bele tama iha 90%”, nia informa ba Jornalista sira,iha kna’ar-fatin, Segunda ne’e.
Koordenadór ne’e hatutan, tuir estimasaun tékniku obra ne’e to’o iha fulan-novembru to’o dezembru 2025 bele atinje 90% liu tanba empreza rua ne’e iha ona ekipamentu no materiál sufisiente.
Enjeñeiru ne’e esklarese,to’o agora empreza BMS seidauk nahe alkatraun kobre trosu ba bairu-bairu tanba sei halo hela teste Aspál iha Laboratóriu Nasionál hamutuk ho Ajensía Dezenvolvimentu Nasionál (ADN).
“Husi parte Bina Mitra ho HK nia AMP ne’e ida-idak uza ninia. MBS nia Aspal teste hotu, iha tempu-badak sira komesa nahe fali. Ne’ebé, ita ezije sira mós iha servisu lembur (oras ekstra),ne’ebé sira servisu loron kalan atu duni tuir governu nia hakarak”, nia dehan.
Kona-ba preokupasaun komunidade dehan estrada diresaun ba Igreja Pro-Katedrál Maliana klo’ot liu, Fernando hatan katal kompaña sei rezolve neneik tanba obra ne’e seidauk finaliza.
“Ita-nia estrada nia luan tuir dezeñu ne’ebé mak iha tama ba Gang-Gan nia dezeñu alkatraun ne’e metru haat (4), maibe sei iha cor concrete metru ida (1) ba sorin loos metru ida (1) ba sorin karuk sai metru neen (6) tanba ita sei iha saluran no penahan (kanalizasaun no barreira) balun iha ne’ebá agora kompaña tau alkatraun tiha ita asesu tiha lai ba mak hotu tiha sira sei cor,” dehan.
Komunidade kontente
Enkuantu, Komuniadade Maliana, Alberto Pereira, sente kontente tanba Maliana sai ona hanesan kapitál ne’ebé nabilan.
“Uluk ne’e estrada kapitál laran de’it mós kuak-ku’ak,tama bairu-bairu ne’e tempu udan hanesan mota – bee-halai tuir fali laran. Agora ami sente kapaz no furak ona,tanba ita liu ba mai bairu-bairu sira mós estrada Aspál hotu ona,husi Nunura sa’e mai Maliana laran ne’e mós Aspál hotu ona,hela de’it uituan tan ami-nia estrada mós di’ak hanesan ho Munisípiu seluk. Ida-ne’e mak ami povu nia hakarak,” nia dehan.
Entretantu, Diretór Transporte Terrestre delegasaun Territoriál Munisípiu Bobonaru,Tomas Maia, husu ba utente rodoviariu iha kapitál Maliana provizoriamente atu halo movimentu ho kuidadu no atensaun tanba sinais tránzitu barak empreza konstrutora hasai.
“Ida-ne’e ligadu ho ita-nia vida ne’ebé presiza ita-bo’ot sira nia konsiénsia, inklui atu labele impede ema seluk tanba kompaña halo projetu ne’e mós fó prioridade ba ita utiliza estrada ne’e tanba sira halo sorin, depois sorin sira husik para ema asesu” nia fó hanoin.
Tomas relata DNTT Munisípiu Bobonaru submete ona ba Ministeriu Obras Publika no Empreza Konstrutora kona-ba rezultadu peskiza sinál tránzitu orizontál no vertikál ne’ebé atu halo instalsaun ba estrada foun ne’e.
Enkuantu reablitasaun estrada Maliana pakote II ne’ebé responsabliza husi empreza HK gasta orsamentu hamutuk milaun $21 resin no BMS milaun $12.
Notisía relevante:PAM Bobonaro husu empreza HK-BMS ezekuta projetu estrada Maliana ho kualidade
Jornalista:Sergio da Cruz
Editór: Rafael Ximenes de A. Belo
