DILI, 09 Setembru 2025 (TATOLI)—Atleta nasionál hamutuk na’in-53 inklui pesoál ofisiál ho treinadór na’in-21 husi modalidade lima sei kompete iha kompetisaun The Southeast Asian Games (SEA Games) ne’ebé tuir planu sei realiza iha Thailándia.
Atleta mensionada kompostu hosi atletizmu na’in-hitu (7), Boxe sanulu (10), Taekwondo na’in-sia (9), Karate-do na’in-hitu (7) no Futeból hamutuk na’in-20.
“Atleta sira-ne’ebé define ona sei tama kedas ba faze preparasaun tanba tempu ba preparasaun agora menus ona husi loron 90,” Prezidente Konfederasaun Desportiva Timor-Leste (CDTL-sigla portugeza), Macario Floriano Sanches hateten liuhosi komunikadu ne’ebé TATOLI asesu, Tersa ne’e.
Macario Sanches hatutan CDTL hamutuk ho Ministériu Juventude, Desportu, Arte no Kultura (MJDAK) konkorda desizaun hodi define númeru modalidade ne’ebé Governu apoiu hodi aumenta númeru atleta.
CDTL husu atleta sira atu prepara-aan di’ak liután, nune’e la partisipa maibé kompete ho kualidade para bele hatudu atleta Timor-Leste maduru no preparadu iha kompetisaun SEA Games tinan 2025.
Entretantu, Governu liuhosi MJDAK deside hodi apoia modalidade lima ne’ebé mak sei kompete iha SEA Games hahú iha loron-09-20 Dezembru tinan ne’e nia rohan, iha Thailándia.
Jornalista: Natalino Belo
Editór: Xisto Freitas da Piedade
