VIKEKE, 09 Setembru 2025 (TATOLI)—Komandante Polísia Nasionál Timor-Leste (PNTL) Munisípiu Vikeke, Superintendente Polísia António Rego Fernandes, informa daudaun ne’e joven Vikeke hamutuk na’in-754 mak submete ona dokumente ba vaga rekrutamentu PNTL tinan 2025.
“Kona-ba vaga PNTL nian, ita hahú distribui formuláriu ba joven sira iha 05 Agostu 2025. Ohin loron ikus ba kandidatu sira hodi submete dokumentu. Nune’e, dadus provizóriu daudaun ne’e hamutuk na’in-754,” Superintendente Polísia António Rego Fernandes dehan ba TATOLI, iha nia kna’ar fatin, Beskem, Vikeke, Tersa ne’e.
Nia hatutan husi númeru 754 ne’e kompostu hosi kandidatu jerál iha na’in-575, jerasaun patriota hamutuk na’in-127 no membru PNTL nia oan na’in-52.
“Ohin hanesan loron ikus ba submisaun dokumentu ne’ebé taka iha tuku 09h00. Tuir planu, aban ekipa PNTL sei lori dokumentu sira-ne’e ba nasionál hodi halo prosesu kontinuasaun,” nia hato’o.
Notísia relevante: Komjer PNTL solisita joven Vikeke-oan konkorre vaga PNTL
António Rego informa hahú prosesu distribuisaun formulária joven hamutuk na’in-1.109, maibé joven balun altura, idade la to’o no balun idade ne’e liu sira labele konkorre, tanba ne’e mak agora daudaun ne’e konkorrente hamutuk 754.
“Ha’u husu ba joven sira-ne’ebé submete ona dokumentu nafatin hatudu karakter di’ak iha sosiedade, presiza halo ezersísiu no estuda tanba sei liuhusi prosesu lubuk ida, foin mak submete dokumentu. Joven sira presiza prepara-aan ba etapa sira tuirmai,” nia sujere.
Jornalista: Vitorino Lopez da Costa
Editór: Xisto Freitas da Piedade
