OEKUSI, 12 Setembru 2025 (TATOLI) – Xefe suku na’in-haat, reprezenta sub-rejiaun Pante Makasar, Oésilo, Nítibe no Pássabe, kinta ne’e, hala’o enkontru ofisiál ho Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, hodi husu labele halo ezonerasaun ba kargu jestór sub-rejionál haat iha Oekusi.
Notísia relevante:Autoridade RAEOA hasai sirkular ezonera kargu xefia sira
Xefe suku na’in-haat ne’e mak hanesan, Xefe Suku Costa Francisco Colo, hodi reprezenta sub-rejiaun Pante Makasar, Xefe Suku Usitaqueno Francisco Elo reprezenta sub-rejiaun Oésilo, Xefe Suku Suni-Ufe Crisanto Tamele reprezenta sub-rejiaun Nítibe no Xefe Suku Abani Carlos Elo reprezenta sub-rejiaun Pássabe.
“Ohin ami mai hasoru Prezidente Autoridade atu ko’alia kona-ba estrutura la’o daudaun, iha estrutura balun ne’ebé mak presiza atu halo mudansa hanesan administradór postu administrativa sira tanba ami mai konfirma ho Prezidente Autoridade tanba liga ho ami-nia insentivu, ne’ebé mak tama iha subvensaun públika, bainhira Prezidente Autoridade halo mudansa karik sei afeta ba ami-nia nesesidade ida-ne’e, tan ne’e ami husu sira mantein nafatin,” nia dehan iha Oekusi, ohin.
La’ós ne’e de’it, ami ko’alia mós kona-ba serbisu ne’ebé mak Autoridade Sesante sira halo ona, kuandu la nesesita atividade ekonómika bázika ba povu karik, la presiza tau ba asuntu emerjénsia, maibé kuandu serbisu ne’ebé mak prioridade ba povu nia atividade ekonomia, ida-ne’e bele tau ba kurtu prioridade, nune’e bele kontinua la’o.
Nia dehan, hafoin aprezenta rekomendasaun sira-ne’e, Prezidente Autoridade RAEOA responde ho pozitivu katak, pedidu husu ezonerasaun ba kargu jestór sub-rejiaun sira tama iha meja Prezidente Autoridade RAEOA, maibé nia la aseita.
“Tanba nia (Prezidente Autoridade) mai atu hadi’a la’ós atu estraga serbisu administrasaun iha baze, resposta ida-ne’e mak, ohin Prezidente informa hela mai ami xefe suku na’in-haat ne’e,” nia hateten.
Notísia relevante:PM Xanana atribui prioridade neen ba PA RAEOA ezekuta durante fulan tolu
Lembra fali katak, antes ne’e, Prezidente Autoridade RAEOA, Régio Servantes Romeia da Cruz Salu, hasai karta sirkulár ida ho númeru ref, 02/GAB/PA/RAEOA-TL/IX/2025, ho asuntu atu hakotu (cessasaun) ba kargu xefia sira, hanesan xefe departemantu diretór rejionál husi estrutura sesante nian.
Jornalista Ajénsia TATOLI,I.P asesu , karta ne’e sita pontu importante haat mak hanesan:
- Bazea ba terseira alterasaun lei númeru 018/2023, loron 30 Novembru, alterada husi lei númeru 3/2014, loron 18, Juñu, ne’ebé kria RAEOA, liu-liu iha artigu 18 haktuir katak, Prezidente Autoridade nu’udar reprezentante másimu Rejiaun, respondendu perante Primeiru-Ministru.
- Artikula funsionamentu kompeténsia Prezidente Autoridade RAEOA iha dekretu-lei númeru 5/2015, loron 22 Janeiru, kona-ba estatutu RAEOA, ne’ebé previstu iha artigu 24, númeru 1. alinea A katak, Prezidente mak dirije no reprezenta hafoin afirma liu tan iha númeru 2 alinea R katak, Prezidente Autoridade mak iha kompeténsia atu nomea no ezonera tuir observasaun prosedimentu legál, ba titular Cargos iha Administrasaun Públika Rejiaun nian hanesan Jestaun funsionamentu adekuadu ba servisu públiku.
- Bazea ba númeru 2 husi rezolusaun Governu númeru 37/2025, loron 28 Agusto, nomea ona kargu xefia sira hahú husi diretór jerál, no diretór rejionál sira.
- Tuir minutas enkontru koordenasaun, no orientasaun polítika husi Primeiru-Ministru no inklui Ministra Finansa iha pontu 2 alinea 2.4 katak ba kargu xefia sira-ne’ebé la mensiona iha Rezolusaun Govermu númeru 37/2025, loron 28 Agostu, sei nomeia pontu fokal ba ida-idak tuir nesessidade.
“Determina katak, husi konsiderasaun legal hirak ne’ebé sitadu iha leten, kapasidade hanesan katak Prezidente Autoridade RAEOA no mós nu’udar reprezentante másimu rejiaun nian, ne’ebé previstu iha artigu 18.o husi lei númeru 18/2023, loron 30 Novembru, alterada husi lei númeru 3/2014, loron 18 juñu no previstu mós iha artigu 24.o, númeru 1 alinea a no númeru 2 alinea katak Prezidente Autoridade RAEOA iha kompetensia atu nomea no ezonera tuir servisu no nesesidade administrasaun públika nian,” sita iha karta sirkulár ne’ebé Ajénsia TATOLI aesu, ohin.
Tanba ne’e, liuhusi sirkulár referida, fó informasaun ba kargu xefia sira hotu katak estrutura kargu xefia hanesan diretór rejionál no xefi departamentu sira-ne’ebé nomea no pose tuir despaxu Prezidente Autoridade RAEOA sesante automatikamente cessa ka hakotu.
“Iha pontu primeiru husi klauzula anteriór katak, kargu xefia maske cessa ona maibé tenke mantein serbisu públiku hodi asegura funsionamentu institusionál to’o Prezidente Autoridade RAEOA halo nomeasaun foun tuir nesessidade no responsabilidade,” hakotu sirkulár ne’e.
Notísia relevante:PA RAEOA ‘rekruta’ asesór rua ba asuntu veteranu no prezervasaun patrimoniál
Jornalista: Abílio Elo Nini
Editór: Rafael Ximenes de A. Belo
