DILI, 17 Setembru 2025 (TATOLI)-Ministéria Planeamentu Inviestimentu no Estratéjiku (MPIE) liuhusi Komisaun Nasionál Aprovizionamentu (CNA) ofisialmente kansela prosesu aprovizionamentu sosa viatura foun ba deputadu sira, hafoin simu karta pedidu kanselamentu husi Parlamentu Nasionál (PN).
Notísia Relevante: Parlamentu aprova ho unanimidade rezolusaun ba kanselamentu sosa viatura foun
Ministru Planeamentu Inviestimentu no Estratéjiku, Gastão Sousa, hateten klaru sira simu fali ona karta pedidu husi Parlamentu Nasionál ba kanselamentu sosa viatura foun, nune’e parte Komisaun Nasionál Aprovizionamentu mós ofisialmente públika ona karta ofisiál referida.
“Signifika katak bainhira CAN simu ona karta entaun normalmente sira iha direitu tomak hodi halo kanselamentu ba aprovizionamentu ne’e rasik,” Ministru ne’e informa ba Agência Tatoli liuhusi telefónika, ohin.
Maibé, nia hateten, orsamentu sira-ne’ebé kansela ne’e sei la aloka ba parte Governu nia tanba Parlamentu Nasionál ne’e orgaun ketak ida, entaun orsamentu sira-ne’e konforme sira rasik mak halo aprovasaun, ne’ebé sira mak sei hatene atu aloka osan ba iha parte ne’ebé.
“Konserteza osan ne’e labele fó ba Governu tanba se bainhira atu aloka ba Governu tenke liuhusi orsamentu ratifikativu, nune’e deputadu sira só bele halo de’it ajusta interna iha Parlamentu laran. Maibé, karik to’o tinan ida mak ramata sira tenke entrega ba kofre Estadu,” nia esplika.
Enkuantu, tuir proposta Orsamentu Jerál Estadu (OJE) ne’ebé Parlamentu Nasionál prevee atu sosa karreta foun ba deputadu sira hodi hala’o servisu fiskalizasaun iha baze ho montante millaun $4-resin.
Notísia Relevante: PNTL husu labele halo anarkizmu, CNRT-PD-KHUNTO kansela sosa Prado
Jornalista : Alexandra da Costa
Editór : Cancio Ximenes
