DILI, 19 Setembru 2025 (TATOLI)—Governu liuhusi Ministériu Turizmu no Ambiente halo preparasaun atu realiza forum investimentu turismu Timor-Leste 2025 ne’ebé sei realiza hahu husi 25-27 Setembru 2025 iha Sentru Konvensaun Dili (CCD, sigla portugés).
Bazeia ba publikasaun ofisiál husi ministériu ne’e haktir, forum ne’e nu’udar estratéjia nasionál hodi halo promosaun turizmu Timor-Leste, inklui mós loke oportunidade hodi fortalesimentu parséria, hasa’e investimentu no halo promosaun produtu úniku husi komunidade lokál sira.
“Forum ne’e sei envolve emprezariál lokal, investór no entidade Governu ne’ebé iha kompeténsia hodi hametin parséria hodi dudu kreximentu turizmu ba futuru oin mai,” Ministru Turismu no Ambiente, Francisco Kalbuadi Lay, informa liuhusi dokumentu portál Governu ne’e Agência Tatoli asesu, ohin.
Iha parte seluk mós hodi dada (atrai) investór no espasu negósiu inovativu, halo promosaun produtu no atendementu setór turizmu iha Timor-Leste ne’e identiku no promosaun ba nasaun ida-ne’e hanesan destinasaun turizmu ne’ebé inkluzivu iha futuru oin mai.
Forum ba etapa daruak ne’e realiza iha ámbitu selebrasaun loron internasionál ba turizmu iha mundu tomak ne’ebé sempre hala’o iha loron 27 fulan-Stembru kada tinan.
Atividade ne’e rasik sei envolve empreza lokál, investór sira, parte indústria no mós entidade Governu hodi fahe esperiénsia no forma rede estratéjia hodi promove setór turizmu.
Aleinde ne’e, forum investimentu ne’e rasik sei destaka vantajen investimentu di’ak ba Timor-Leste hanesan ekonomia foun ne’ebé bele moris ho estabilidade, bele asesu merkadu exportasaun ba nasaun 59 ho populasaun millaun haat-resin, kustu traballadór ne’ebé kompetitivu no mós rejime taxa ne’ebé atrai inklui insentivu ho liberdade taxa to’o tinan 10.
Nune’e mós Timor-Leste oferese estabilidade polítika no seguransa ne’ebé relativu aas iha área ne’ebé sai hanesan fatin potensiál destinasaun ba investór sira ho duransaun ne’ebé naruk.
Forum investimentu turizmu Timor-Leste 2025 realiza ho servisu hamutuk entre Ministru Turizmu no Ambiente (MTA) ho International Finance Corporation (IFC), Tradelvest Timor-Leste, Autoridade Turizmu Timor-Leste (ATTL) no mós hetan apoiu husi Vise Primeiru-Ministru, Ministru Koordenadór Asuntu Ekonómika (MKAE).
Jornalista : Alexandra da Costa
Editór : Cancio Ximenes
