BOBONARU, 20 Setembru 2025 (TATOLI)-Grupu Foinsa’e Juventude Balibo Oan halo abertura ba jogu komunitáriu futeból no halai maratona iha ámbitu selebrasaun loron liberdade imprensa “Balibo Five” ba da-50.
Atividade ne’e hetan fundu husi Ministériu Juventude, Desportu, Arte no Kultura (MJDAK) ho montante $2,500, no jogu ne’e rasik sei realiza entre loron 20 Setembru to’o 11 Outubru 2025.
Prezidente Komisaun Organizadora Grupu Foinsa’e Juventude Balibo Oan, António Kaylorok Pires, hateten objetivu husi jogu ne’e mak atu selebra loron liberdade imprensa, liuliu trajedia jornalista na’in-lima ne’ebé hetan oho husi militár Indonézia iha tempu invazaun iha loron 16 fulan-Outubru 1975.
“Inisiativa ne’e ami halo atu komunidade iha postu administrativu bele hanoin hikas fali trajedia ne’e to’o jerasaun ne’ebé sei mosu mai”, António Pires dehan ba Tatoli via telefone, ohin.
Tanba ne’e, nia dehan loke kompetisaun ne’e hodi halibur ema hotu atu marka data ne’e no eventu referidu realiza ona ba daruak.
“Maná-na’in sira ba eventu ne’e sei hetan osan no tasa, maibé kona-ba osan ha’u seidauk bele mensiona atu oferese ba kada vensedó sira, tanba ami sei halo kalkulasaun”, nia esplika.
Nia mós hato’o mensajen iha loron importante ne’e atu ema hotu nafatin prezerva memória moruk ne’e iha idaidak nia hanoin, katak pasadu bele moruk maibé tempu to’o ona ba jerasaun foun atu kontinua hatudu talentu hodi hateten adeus konflitu no benvindu ba dezenvolvimentu.
“Ba jogadór sira tenke kompete tuir regra no nafatin dezenvolve ita-boot sira-nia talentu, liuhusi jogu kominitáriu”, nia apela.
Klube ne’ebé kompete iha jogu ne’e hamutuk 16 mak hanesan FC Fatukakae Morutau United, Duabesi FC, São Gabriel FC, Malisesu FC, Santo Bernadino FC, Colégio Palaka FC, Mendadak FC, One Family FC, FC Union Joven Centro, Magarlelo FC, Dufagu FC, Mate Resto FC, FC Cruz Ren, Lafaek Fronteira FC, ESG Balibo FC no Matak Malirin FC.
Iha jogu abertura ne’e klube FC Fatukakae Mortau United manán Malisesu FC ho eskor 5-2.
Jornalista: Alexandra da Costa
Editora: Maria Auxiliadora
