DILI, 22 Setembru 2025 (TATOLI)—Diretór Servisu Apoiu Diagnóstiku no Terapeutiku iha HNGV, Vidal de Jesus Lopes, informa estoke raan menus menus iha Banku de Sangue HNGV tanba laiha doadór raan permanente atu halo doasaun raan.
Nia hateten, estoke raan menus ne’e tanba kuaze pasiente sira husi ospital rejional no referensia sira iha teritoriu nasionál dependente ba Banku Sangue iha HNGV.
Notísia Relevante:
“Ran ne’e la’ós ai-moruk ka ekipamentu baibain ne’ebé bele prodús ho fasil, maibe raan ne’e iha ema-nia isin mak foti hodi tau fali ba ema seluk nia isin tanba ne’e susar uitoan. Tanba ne’e, la’ós ai-moruk ida-ne’ebé ita ba buka fábrika atu prodús, maibe raan ne’e iha ema-nia isin tanba ne’e ita atu ba foti ema-nia ran ida mai tau ema seluk ne’e liu husi prosesu. Ita tenke oferese ema ne’e seguru, ema-ne’e nia kondisaun di’ak mak ita foti la’ós fasil, maibé ami hato’o pedidu pois ema ne’e hatán mak ami ba foti,’’ Vidal Lopes esplika ba jornalista sira iha HNGV Bidau, ohin.
Vidal hateten, estoke raan iha Banku de Sangue ne’e depende demanda ka pasiente tanba ne’e estoke raan iha HNGV la garante nafatin iha, maibe dala ruma tenke hotu lalais tanba pasiente barak demais.
“Bainhira ita ba buka iha mak depois mai hotu lalais, tanba depende ba demanda. Estoke ne’e on-of, dalaruma agora laih ona, tanba ita-boot sira imajina iha HNGV rasik nia pasiente barak ona, dalaruma ema ida bele presiza raan plastiku ida to’o tolu, sidauk tan pasiente husi hospitál referal sira-ne’ebé nia mai depois sai nune’e hela de’ it,” nia haktuir.
Nia hatutan, maske nune’e HNGV sempre halo esforsu hodi responde preokupasaun pasiente sira nian hanesan hato’o karta ba eskola no instituisau Estadu sira hanesan membru Falintil Forsa Defeza Timor Lorosae (F-FDTL), Policia Nasional Timor Lorosae (PNTL) hodi halo diasaun maske dala barak raan ne’ebé sira oferese labele uza hotu tanba balun enfrenta moras.
“Ami halo karta ba katak loron ida-ne’e imi hala’o doasaun aran, depois foti hotu tiha mai prosesu ida-ne’ebé mak di’ak, ami uza ida-ne’ebé mak ladi’ak ka iha moras ne’e ami labebele uza ka elemina. Tanba la signifika hotu hotu ne’ebé ema hasai ne’e ita tenke uza, maibé tenke prosesa tanba dalaruma balun iha moras ne’e, ita labele uza tanba raan tenke seguru,” nia informa.
Nia dehan, tuir dadus totál estoke raan ne’ebé dadauk disponivel iha Banku de Sangue HNGV hamutuk 133.
Husi total 133 ne’e ran mean iha 52, Plasma ou Globu mutin 53 no Cartin det iha 18. Husi ida-ne’e raan ho tipu A+ ne’e hamutuk 24, tipu B+ ne’e hamutuk 5 (lima), tipi AB+ ne’e hamutuk hiru (7) no tipu O+ hamutuk 16.
Jornalista : Felicidade Ximenes
Editór : Cancio Ximenes
