DILI, 24 Setembru 2025 (TATOLI)—Ministériu Asuntu Kombatente Libertasaun Nasionál (MAKLN) sujere muda Saudozu Sebastião Gomes nia rate ba portaun oin, nune’e hamenus problema ba rate ne’ebé barak iha Kapela Pai Nosso oin.
“Negosiasaun ho família Komité mak tenke halo. Tanba ne’e, proposta Komité ninian hodi loke dalan bá Saudozu Sebastião nia rate. Maibé, to’o agora sai kestaun boot ne’ebé labele rezolve tanba rate barak iha oin. Entaun, ami sujere ona ba sira atu muda de’it saudozu nia rate mai oin duké sobu rate barak,” Sekretáriu Estadu ba Veteranu, César dos Santos da Silva “Merak” informa ba TATOLI, iha nia kna’ar fatin, Kaikoli, Dili, Kuarta ne’e.
Notísia relevante: KAFI diskute fali prosesu konstrusaun Monumentu Memoriál Masakre Santa Krús
Govenante ne’e hatutan halo negosiasaun ba kestaun muda rate barak ne’e sei lori tempu no iha problema mós tanba liga uitoan kultura ne’e bele sobu ka lae.
“Ida-nee ami soe hela ba para sira tetu no deside tanba projetu ne’e agora iha hela Konsellu Administrasaun Fundu Infreaestrutura (KAFI) nia liman. Projetu boot entaun KAFI mak deside,” nia esplika.
Entretantu, Diretór Empreza Konstrutora Bobolait, Lda, Carlito Pereira hateten Governu aloka orsamentu konstrusaun ba monumentu Santa Krús ka Memoriál 12 Novembru ne’e hamutuk $1.385.389,88.
“Ita iha orsamentu adisionál tanba uluk osan iha $1.385.389,88 no agora sa’e ba milliaun $3.7-resin. Depoiz osan ne’ebé atu sosa estátua ne’e milliaun $1.800,” Carlito esplika.
Konstrusaun hahú iha loron-22 Setembru 2021 to’o 22 Setembru 2022 maibé seidauk konkluidu, nune’e Governu liuhusi Ministériu Asuntu Kombatente Libertasaun Nasionál (MAKLN) prolonga to’o tinan 2023 maibé seidauk hetan konkluzaun nafatin.
Jornalista: Osória Marques
Editór: Xisto Freitas da Piedade
