DILI, 25 Setembru 2025 (TATOLI)–Ministru Interiór, Francisco da Costa Guterres, hateten, jogu online no online scam ne’e Governu entrega ona ba parte investigasaun.
“Kazu krime online scam ne’e ita entrega ba investigasaun. Ita lalika ko’alia kona-ba buat ne’e, tanba iha ona iha PCIC (Polísia Sientífika Investigasaun Kriminál), imi entrevista Diretór PCIC, ita entrega ona ba nia,” Ministru Interiór informa ba Ajénsia TATOLI hafoin partisipa iha reuniaun Konsellu Ministru, iha Palásiu Governu, Kinta ne’e.
Nia dehan, Governu labele halo fali PCIC nian serbisu tanba idaidak ho ninia tarefa.
“Ami labele, Primeiru-Ministru mós ko’alia ona, ba asuntu krime online ne’e iha instituisaun ne’ebé mak haree ba buat ne’e, lá’os ita hotu ba haree lisuk, ne’e iha instituisaun ida-ne’ebé mak apropriadu ba ida-ne’ebá,” nia akresenta.
Notísia relevante : PSIK ho SNI buska apreensaun no desmantela jogu online ilegál iha Oekusi
Nune’e, nia husu ba públiku atu hein rezultadu husi serbisu PCIC ba kazu jogu online no burla informátika ne’ebé akontese iha Oekusi foin lalais ne’e.
“Ita husik, sira-nia investigasaun la’o nafatin para ita haree sé mak iha ne’ebá, ne’e tenke loke sai hotu, ne’ebé sira sei haree iha ne’ebá,” nia akresenta.
Governante ne’e rejeita ninia envolvimentu iha jogu online no online scam ne’ebé ema barak lansa iha rede sosiál.
“Husu took ema ida-ne’ebé mak dun, depois ha’u sei lori nia bá Tribunál, nia bá check tok ha’u, ha’u buka duni ida-ne’e para fó hatene ha’u. Fó hatene ema ne’e nia naran ba ha’u, depois ha’u lori nia bá Tribunál, para nia bá haree katak envolve duni iha jogu online ne’e ka lae. Se akuzasaun falsu ha’u tenke lori nia bá Tribunál,” nia katak.
Jornalista : Natalino Costa
Editora : Julia Chatarina
