OEKUSI, 01 Outubru 2025 (TATOLI) – Tuir dadus ne’ebé Institutu Defeza Direitu Labarik (INDDICA-sigla portugés), rekolla husi Janeiru to’o Setembru 2025 ne’e, rejista ona labarik ho idade minoridade hamutuk na’in-ualu iha interese atu fila-fali ba rai moris fatin Rejiaun Administrativa Espesiál Oekusi Ambeno (RAEOA) hodi kontinua fali sira-nia estudu, tanba antes ne’e hakotu sira-nia estudu iha ensinu primáriu hodi envolve iha vida negósiu iha kapitál Dili.
Prezidente INDDICA, I.P, Dinorah Granadeiro, koordena ona ho Prezidente Autoridade RAEOA, atu apoia no fasilita, nune’e bele lori fila to’o inan-aman sira atu kontinua fali estudu.
“Tinan ne’e, ita rejista ona labarik na’in-ualu, tanba hakarak fila-fali mai Oekusi, atu kontinua sira-nia estudu, ohin ita mai informa ba Prezidente Autoridade ho nia estrutura tomak, atu apoia fasilita, ita-nia oan sira-ne’e, tanba sira ho idade husi 12 to’o 17 ne’ebé antes ne’e hakotu sira-nia estudu, tanba kondisaun ekonómia família nian la permite sira atu kontinua sira-nia estudu, entaun obrigatóriu tenki halo negosíu faan sasan iha dalan ninin iha kapitál Dili hodi ajuda fali família,” nia hateten ba jornalista sira iha Oekusi.
“Sira iha interese bo’ot atu kontinua sira-nia estudu iha Oekusi, entaun saida mak INDDICA halo, entaun ita tenta atu fasilita sira fila-fali mai Oekusi, atu bele kontinua fali sira-nia estudu ho apoia másimu husi Autoridade RAEOA,” nia énfaze.
Notísia relevante:INDDICA koordena ho APORTIL kontrola labarik Oé-Cusse halo viajen mai Dili
Nia lembra fali katak, tinan hirak kotuk, parte INDDICA mós desloka ona labarik sira husi Dili ne’ebé involve iha vida negósiu ho idade minoridade, oras ne’e kontinua fali ona sira-nia estudu, no hetan mós atensaun husi serbisu sosiál nian, liu-liu ba nesesidade eskola nian.
“Esforsu durante ita halo serbisu atu lori fila labarik sira. Ami serbisu kle’ur ona, antes ne’e ita koopera serbisu hamutuk ho autoridade anteriór, ne’ebé ita konsege lori fila labarik balun mai ona Oekusi, ita agradese tanba serbisu hamutuk ne’e konjunta liuhusi edukasaun ba sentru solidariedade sosiál, polísia komunitária, autoridade lokál sira xefe suku no xefe aldeia sira, tanba fasilita tebes ami bainhira ami lori fila alin sira-ne’e,” nia afirma.
Notísia relevante:INDDICA preokupa labarik barak hosi Oé-Cusse fa’an sasán iha Dili
Iha fatin hanesan, Prezidente Autoridade RAEOA, Régio da Cruz Salu, orgullu tanba Gabinete RAEOA iha Prezidente Autoridade RAEOA nia okos, no sei serbisu hamutuk ho unidade serbisu estruturál, funsionál Diresaun Rejionál Edukasaun no Solidariedade Sosiál, no mós Diresaun sira-ne’ebé ligadu, tantu ho entidade parseria (stakeholder), ne’ebé direita no indireita, atu haree asuntu planu asaun rejionál ne’e, bele abranje ba nia objetivu.
“Ita hotu sempre ko’alia kona-ba inan-aman sira-ne’ebé husik labarik sira ba buka moris iha Dili, ha’u hanoin pozitivamente atu hateten ba ita, ne’e hatudu katak ita laiha oportunidade ona iha ne’e ampla, hakarak ka lakohi tenke sai husi Oekusi ba, ho RAEOA no ZEEDOA. Ita tenke garante katak, Oekusi-oan sira hahú husi sira-nia ona sira, nia fatin oportunidade atu moris digna, hahú husi Oekusi, ne’e ita-bele haree ho kompromisu ida-ne’e, ita-bele serbisu maka’as, no kompromisu ida-ne’e, labele remata,” nia salienta.
Tanba ne’e, hanesan Prezidente Autoridade, tenke kontinua nu’udar obrigasaun morál, institusionál polítika rejionál, inan-aman sira hotu nia obrigasaun atu prepara Oekusi nia oan sira sai rekursu potensiál, ema ne’ebé iha dignidade profisionál, intelektuál, bele sai sidadaun ativa, importante, poténsia ba dezenvolvimentu Oekusi, nu’udar rejiaun espesiál administrativa, no zona espesiál ekonomia, ne’ebé reziliente no atraidu ba moris dignu povu ida.
Notísia relevante:INDDICA – RAEOA selebra akordu promove koordenasaun proteje direitu labarik iha Oekusi
Jornalista: Abílio Elo Nini
Editór: Rafael Ximenes de A. Belo
