OEKUSI, 30 Setembru 2025 (TATOLI) –Institutu Defeza Direitu Labarik (INDDICA-sigla portugés) ho Autoridade Rejiaun Administrativa Espesiál Oekusi Ambeno (RAEOA), tersa ne’e, selebra Memoramdum of Understanding (MoU) atu haforsa no promove liña koordenasaun hodi proteje direitu labarik sira-nian iha Oekusi.
Notísia relevante:INDDIKA introdús papél direitu-devér labarik ba estudante Kátolika Oé-Cusse
Prezidente INDDICA, Dinorah Granadeiro, informa, objetivu prinsipál husi akordu ne’e, atu haforsa liña koordenasaun serbisu sira kona-ba oinsá atu asegura no fó imputasaun ba direitu labarik sira-nian iha Oekusi.
Tanba Oekusi hanesan rai-ketan ho autonomu rasik, entaun INDDICA labele mai interven halo serbisu direita, tenke iha akordu ida, nune’e bele sai hanesan baze legál ba iha serbisu futuru ne’ebé INDDICA halo ho koordenasaun no autorizasaun koñesimentu husi Autoridade RAEOA.
“Ita-nia serbisu fokuliu kona-ba asegura labarik hot-hotu iha Oekusi, goza duni sira-nia direitu fundamentu haat, ne’ebé konsagra ona iha Konstituisaun RDTL, no hanesan Estadu parte ida ba iha konvensaun direitu labarik, ita-nia Estadu Timor-Leste liuhusi Governu iha obrigasaun tomak atu kumpre no fó duni prioridade ba iha asuntu labarik nian liu-liu oinsá asegura labarik sira-nia iha Oekusi, bele goza sira-nia direitu,” nia hateten hafoin selebra akordu iha Oekusi, ohin.
Notísia relevante:INDDICA preokupa labarik barak hosi Oé-Cusse fa’an sasán iha Dili
Prezidente Autoridade RAEOA, Régio da Cruz Salu, konsidera MoU ne’e amostra no hatudu kompromisu polítika institusionál no morál Governu liuhusi Autoridade RAEOA, tanba Estadu nia kompromisu kona-ba direitu protesaun labarik no mós Governu nia kompromisu, povu nia obrigasaun no dezeju atu haree sira-nia oan ne’e nia futuru sai di’ak.
“Tanba ne’e MoU ne’e amostra ita-nia obrigasaun institusionál hahú husi serbisu instituisaun estruturál no funsionál, nune’e ita-bele halo serbisu. Entaun, ho MoU ne’e, ita hahú ona, kontinua harii unidade ida iha RAEOA ho naran unidade tékniku ba asuntu protesaun direitu labarik, ne’ebé sei serbisu hamutuk ho INDDICA, atu adota no harii planu asaun rejionál kona-ba oinsá mak hakotu violénsia hasoru labarik, no oinsá atu dezenvolve talentu no poténsia labarik hanesan futuru lidér Oekusi ein-prosesu,” nia katak.
Notísia relevante:INDDICA halo avaliasaun hodi prodús módulu kona-ba proteje labarik husi violasaun
Jornalista: Abílio Elo Nini
Editór: Rafael Ximenes de A. Belo
