OEKUSI, 11 Fevereiru 2025 (TATOLI) – Institutu Defeza Direitu ba Labarik (INDDICA, sigla portugés), halo avaliasaun hodi halibut ideia atu prodús módulu kona-ba proteje labarik husi violasaun iha Rejiaun Administrativa Espesiál Oekusi Ambeno (RAEOA).
Biban ne’e, Prezidente INDDIKA, Dinorah Granadeiro, informa, atividade ne’e realiza durante loron rua, hodi halo Avalon ba alvu mak ba inan-aman no autoridade lokál liuliu xefe suku no xefe aldeia sira no família ba ema ho defisiénsia.
Notísia relevante:Prezidente INDICCA: “Traballu infantíl bele iha konotasaun esploitasaun ba labarik”
Objetivu husi avaliasaun atu rekolla informasaun tanba INDDICA dezenvolve hela módulu rua hanesan kuidadu labarik ho di’ak no ho responsabilidade hanesan kuidadór ba labarik sira no partisipasaun sosiedade nian hodi kuidadu labarik sira.
“Avaliasaun ne’e atu hatene konstestu loloos timor-nian, maibé ita foti ho Oekusi hanesan Rejiaun Espesiál, tanba iha kazu aas relasaun ho violasaun feto no labarik. Tan ne’e INDDICA halo avaliasaun iha Oekusi atu haree mekanizmu saida mak ita-nia Estadu estabelese ona ne’e, nia lala’ok to’o ohin loron ne’e komunidade kumpre ka la’e,” hatete Prezidente INDDICA iha Oekusi, ohin.
Ho módulu ne’e, nia iha esperansa ajuda komunidade liuhusi formasaun atu hasa’e koñesimentu komunidade sira bele hatene kuida labarik sira ho di’ak tuir ida-idak nia responsabilidade.
Notísia relevante:Loron mundiál labarik, INDDICA husu entidade Oé-Cusse proteje labarik nia moris
Tanba bazeia ba dadus ne’ebé INDDICA hetan katak RAEOA sai hanesan munisipíu ida-ne’ebé iha kazu aas, tuir kedan Dili no Ermera mak iha kazu ho violénsia bazeia ba jéneru liuliu violénsia hasoru feto no labarik.
“Ami hatene situasaun atuál iha Oekusi, nune’e bele buka meiu hodi fasilita alin ona sira-ne’e atu kontinua hela iha Dili ka ou tenke fila mai munisipíu,” nia katak.
Iha fatin hanesan, Sekretária Rejionál ba Edukasaun no Asuntu Sosiál (SREAS), Inácia Tamele, dehan formasaun ne’e importante tebes tanba ko’alia kona-ba protesaun labarik mak sai isu bo’ot no tenke iha responsabilidade husi ema hotu, liuliu inan-aman.
“Tan ne’e, ita agradese INDDICA ne’ebé konvida save children husi Indonézia atu halo diskusaun hodi hamosu módulu kona-ba protesaun direitu labarik nian. Espera diskusaun ida-ne’e bele akumula ideia bazeia realidade povu nia moris. Nune’e bele hakerek módulu ho kualidade hodi ita bele uza,” nia agradese.
Notísia relevante:INDDICA koordena ho APORTIL kontrola labarik Oé-Cusse halo viajen mai Dili
Jornalista: Abílio Elo Nini
Editór: Florencio Miranda Ximenes
