DILI, 01 Outubru 2025 (TATOLI) – Embaixadór Indonézia iha Timor-Leste, Okto Dorinus Manik, iha entrevista eskluziva ho Tatoli, iha Programa Dalan ba ASEAN, hateten Indonézia sai nu’udar parseiru prinsipál ba dezenvolvimentu Timor-Leste nian ho nia investimentu liuhusi setór privadu no banku sira agora to’o ona billaun $1,4.
“Investimentu sira ne’e mai husi kompañia sira iha Timor-Leste hanesan Pertamina, Banku Mandiri, BRI, no Telkomcel, to’o ona pur volta billaun $1,4, no númeru ne’e kada tinan kontinua aumenta”, Okto Dorinus informa ba Tatoli, ohin.
Aleinde investimentu, iha mós kooperasaun ne’ebé nasaun rua ne’e halo iha área dezenvolvimentu infraestrutura, saúde, no edukasaun.
Embaixadór subliña Indonézia nia prezensa investimentu la’ós de’it orienta ba negósiu, maibé mós ba Timor-Leste nia dezenvolvimentu sustentavel. “Indonézia haree Timor-Leste hanesan parseiru estratéjiku ida ba prazu naruk, la’ós de’it hanesan merkadu ida, entaun ami hakarak krexe hamutuk”, nia adianta.
Okto Dorinus reafirma ninia kompromisu ba oin atu hametin relasaun bilaterál, liuhusi kontaktu polítiku, ekonómiku, kulturál, no entre ema no ema.
Tuir nia, relasaun naruk ne’e metin tanba prosimidade jeográfika, istórika, no kulturál maka fundasaun importante sira ne’ebé halo relasaun entre nasaun rua ne’e sai úniku.
“Ami-nia relasaun la’ós de’it intergovernamentál, maibé mós interpopulár, interkulturál, no to’o interfamiliár. Fiar katak relasaun entre sidadaun Indonézia no Timor-Leste nu’udar elementu krusiál hodi hametin maun-alin entre nasaun rua ne’e”, dehan.
Nia fó ezemplu kona-ba konsertu kulturál Indonézia nian ne’ebé hala’o kada tinan iha Dili, ne’ebé komunidade lokál sempre simu ho entuziasmu.
“Ha’u sente emosionadu bainhira ha’u haree joven timoroan sira kanta hamutuk ho lian indonéziu. Ne’e hanesan evidénsia klara katak ita-nia relasaun to’o ona iha povu nia fuan”, nia hateten.
Aleinde kultura, papél padre, madre, no profesór indonéziu sira ne’ebé servisu iha munisípiu oioin iha Timor-Leste mós sai nu’udar ligasaun umanitária ne’ebé hametin amizade.
Embaixadór ne’e mós subliña knaar antigu alunu Timor-Leste ne’ebé termina sira-nia estudu universidade oioin iha Indonézia nian nu’udar ponte ba komunikasaun no kooperasaun. Sira nu’udar rikusoin importante ida hodi hametin nasaun rua ne’e.
Jornalista: Arminda Fonseca
Editora: Maria Auxiliadora
