DILI, 01 Outobru 2025 (TATOLI)—Governu, kuarta ne’e, liuhusi reuniaun Konsellu Ministru aprova Projetu Rezolusaun Governu ne’ebé aprezenta husi Ministru Defeza, Kontra Almirante Donaciano do Rosário Gomes, atu kria Gabinete Interministeriál Jestaun Krize.
Ministru Prezidénsia Konsellu Ministru, Agio Pereira, informa Konsellu Ministru aprova mós tuir programa Governu Konstitusionál da-sia (IX) ninia estratéjia nasionál ba protesaun sosiál no halo mós rezolusaun ida konsellu Ministru aprova hodi kria gabinete interministeriál jestaun krize.
“Iha gabinete ne’e, Primeiru-Ministru, Kayrala Xanana Gusmão mak sei prezide no hola parte mós husi Ministéria seluk hanesan MNEK, MI, MJ, MAE, xefe Forsa Armada no xefe da PNTL, ho servisu nasionál intelijénsia estratéjika,” Ministru ne’e informa ba jornalista sira liuhusi konferénsia imprensa iha Palásiu Governu, ohin.
Tuir dokumentu ofisiál hateten, órgaun foun ne’e sei responsável ba koordenasaun no definisaun termu sira kooperasaun interministeriál nian iha situasaun risku grave ka ameasa ba seguransa nasionál, atu nune’e bele salvaguarda orden, seguransa no trankuilidade públika, nune’e mós garante atuasaun konjunta no koordenada husi Forsa Defeza, Forsa no Servisu Seguransa, no mós ajente sira Protesaun Sivíl nian.
Gabinete Interministeriál Jestaun Krize sei prezide husi Primeiru-Ministru no sei kompostu husi Vise-Primeiru-Ministru sira, Ministru Defeza, Ministru Interiór, Ministru Justisa, Ministru Negósiu Estranjeiru no Kooperasaun, Ministra Finansa no Ministru Administrasaun Estatál, no mós Xefe Estadu-Maiór Jenerál F-FDTL, Komandante Jerál PNTL no Diretór-Jerál Servisu Nasionál Intelijénsia Estratéjika nian.
Nune’e, iha situasaun ne’ebé estraordinária no urjente, funsionamentu Gabinete ne’e sei asegura husi Ministru Defeza no Ministru Interiór, bainhira de’it presiza, membru Governu na’in-rua ne’e sei responsabiliza hodi propoin forma sira koordenasaun interministeriál nian no garante koordenasaun medida, planu no operasaun sira-ne’ebé ho objetivu atu salvaguarda seguransa interna ho operasionalizasaun forsa tarefa konjunta ne’ebé estabelese ona.
Rezolusaun ida-ne’e sei tama iha vigór iha loron ne’ebé hafoin nia publikasaun no sei vigora nafatin to’o loron 6 fulan-Janeiru tinan 2026.
Jornalista : Alexandra da Costa
Editór : Cancio Ximenes
