DILI, 03 Outubru 2025 (TATOLI)—Diretór Servisu Saúde Munisípiu Ermera, António de Jesus, husu ema hotu bainhira asu tata tenke ba fasilidade saúde simu vasina anti raiva.
Notísia Relevante: MS husu populasaun sira vasina asu hodi pervene Raiva
“Ita-nia komunidade balun bainhira asu tata iha sira iha konsiénsia atu hakbesik an fasilidade saúde, nune’e bele simu kompletu vasina, maibé balun fali hetan de’it vasina dala ida no rua lakohi mai ona atu kontinua. Tanba ne’e, husu ba hotu-hotu katak asu banhira tata ona tenke vasina halo kompletu,” António de Jesus dehan ba jornalista iha INSPTL, Comoro, ohin.
Nia dehan, bainhira períodu loron 28 tenke sona dala lima maibé populasaun balun la dixiplina, dalaruma sona dala ida de’it no dala rua de’it no entaun ikus mai mosu sintoma mak halai ba fasiliddae saúde maibé labele salva ona sira-nia vida.
“Iha Munisípiu Ermera, establese ekipa taskforce ne’ebé kompostu husi Prezidente Autoridade Munisípiu Ermera, ami hanesan Sekretáriadu tékniku depois ita-nia administradór postu administrativun neen no xefe suku sira-ne’e inklui hotu iha ekipa ida-ne’e, ho nune’e ami nafatin halo promosaun saúde liuliu hasa’e frekuénsia iha fasilidade saúde sira fó promosaun saúde ba eskola, ba komunidade oinsá atu prevene moras raiva iha munisípiu Ermera,” nia dehan.
Nia afirma, Servisu Saúde Munisípiu Ermera rejistu asu hamutuk 1.454 no asu ne’ebé mak simu ona vasina raiva hamutuk 920.
“Agora daudaun Veternária husi Ministériu Agrikultura Pekuária Peska no Floresta sira halo hela esforsu, tanba sira iha ona ai-moruk no ekipamentu entaun sira esforsu hahú husi Railaku to’o ba Gleno, depois hotu mak ba fatan fatin seluk.
Nia informa, agora asu ne’ebé tata ema ne’e hamutuk 150-resin no husi numeru ne’e ema na’in-haat mak mate.
Notísia Relevante: Pasiente na’in-11 mate iha HNGV tanba Raiva
Jornalista : Felicidade Ximenes
Editór : Cancio Ximenes
