DILI, 05 Outubru 2025 (TATOLI)-Eis-Prezidente Repúblika, Taur Matan Ruak, solisita ba grupu arte marsiál atu hametin unidade no fó kontribuisaun ba paz iha sosiedade.
Matan Ruak hato’o iha diálogu ho grupu arte marsiál Ikatan Kera Sakti-Putera Timor-Leste (IKS- PTL), iha salaun Sta. Madalena de Canossa, iha Has-Laran ho tema “Papél juventude kriativu ba prezervasaun no valorizasaun arte oioin hodi hametin kultura iha Timor-Leste”.
Matan Ruak observa katak, durante ne’e, nia akompaña hela kona-ba asuntu arte marsiál, inklui rituál nian, no bainhira sei asume knaar hanesan membru Governu sempre halo diálogu ho komunidade no sira sempre kestiona kona-ba arte marsiál.
“Tanba ne’e, ha’u mai halo diálogu ho imi la’ós atu manán votu, maibé ha’u fiar katak imi iha forsa ida bele ajuda Governu kombate dezafiu hotu”, nia informa ba jornalista sira iha sábadu ne’e.
Eis-primeiru-ministru dehan sosiedade ida ne’ebé bele hetan susesu mak sosiedade ida ne’ebé organizada, hanesan mós organizasaun arte marsiál bele fó kontribuisaun.
“Entaun, imi-nia serbisu la’ós tuku-malu de’it, preparasaun fíziku, espirituál, morál no emosionál, maibé imi bele halo tan buat seluk ne’ebé pozitivu ba imi-nia an, organizasaun, sosiedade no nasaun liuhusi ajuda malu”, nia esplika.
Reprezentante Prezidente IKS-PTL, António Rangel, hateten daudaun ne’e Governu suspende hela atividade arte marsiál nian iha Timor-Leste, maibé nafatin iha kompromisu no firme ba esperansa.
“Objetivu ohin loron ita hamutuk atu buka solusaun hodi reativa atividade arte marsiál ba futuru”, reprezentante ne’e afirma.
Nia dehandalabarak ema hotu konsidera katak arte marsiál ne’e kriminozu no autór ba konflitu, maibé problema ne’ebé akontese dalaruma ódiu individuál l, tanba arte marsiál laiha doutrina atu hanorin nia ema sai autór ba krime sira.
“Ita nafatin hatudu ita-nia atitude di’ak no fó kontribuisaun ba dezenvolvimentu sosiedade. Arte marsiál la’ós siénsia atu salva-an de’it (ilmu bele diri), maibé ne’e hola parte mós ba atividade desportu nian”, nia hatutan.
Atividade ne’e marka prezensa husi estrutura organizasaun IKS-PTL no membru sira husi sukursál 33 iha
Dili.
Jornalista: Alexandra da Costa
Editora: Maria Auxiliadora
