BOBONARU, 01 Outubru 2025 (TATOLI)-Ministeriu Saude (MS) kontrata ona empreza Micaurora-89 Unip. Lda., no JV Fernandez FJ Unip. Lda., hodi halo manutensaun ba infaestrutura Opitál Referénsia Maliana (HRM, sigla portugés), munisípiu Bobonaru.
Diretór Ezekutivu HRM, José Marçal da Cruz, dehan projetu ne’e loloos hahú inplementa iha loron 04 fulan-Setembru ne’e, maibé falla iha mobilizasaun materiál fabrikadu no foin mak hahú serbisu iha semana rua liubá.
José Marçal esplika katak projetu ne’e implementa bazeia ba pedidu HRM, tanba infaestrutura ne’ebé konstrui husi Banku Mundiál iha 2006 no 2007 barak mak aat no la funsiona.
“Agora serbisu la’o hela. Atividade ne’ebé sira halo mak manutensaun ba odamatan, janela, instalasaun ba asesóriu, lampu sira iha uma-laran no li’ur sira mós kotu hotu. Entaun, sira instala fali lampu para halo naroman, la’e ospitál ne’e kalan ita mai ne’e nakukun”, nia informa ohin.
Manutensaun ne’e sei hala’o iha sala emerjénsia, maternidade, fizioterapia, dapur, sala nutrisaun, laboratóriu, sala izolamentu, armazein no seluk tan.
José Marçal espera ho implementasaun projetu ne’e bele fó satisfasaun ba pasiente no pesoál saúde sira hodi mellora atendimentu saúde.
“Sintina la di’ak, bee-sulin, depois odomatan laiha, ne’e mós la seguru ba pasiente atu bá sintina. Entaun, buat ki’ik sira ne’e presiza atensaun husi Governu”, nia dehan.
Iha sorin seluk, família pasiente, António Afonso Pereira, agardese Ezekutivu tanba bele responde ona preokupasaun públiku nian.
“Ita -ia ospitál ne’e akumula ema barak, más ninia fasilidade barak mak la di’ak. Ida-ne’e ha’u hanoin sé de’it mak mai sira mós preokupa, maibé agora ita-nia Governu hadi’ak ona no ba oin ita sei la halerik tan”, nia garante.
Obra ne’e gasta rihun $11.021,63 ne’ebé sei finaliza iha loron 04 fulan-Novembru tinan 2025.
Notísia relevante: Kontratasaun pesoál saúde 16 iha HRM bazeia ba nesesidade
Jornalista: Sergio da Cruz
Editora: Maria Auxiliadora
